Ինչպես անցկացնել Սուրբ Զատիկը առանց առողջական խնդիրների

Սուրբ Զատիկը կամ Հիսուս Քրիստոսի հրաշափառ Հարության տոնը Հայ Առաքելական եկեղեցու ամենագունեղ ու, թերեւս, ամենատարածված տոնն է: Այն նշանավորվում է նաեւ է Մեծ պահքի ավարտով:

Այդ օրերին առողջական խնդիրներից, սննդային թունավորումներից եւ սննդային գործոնով պայմանավորված վարակներից խուսափելու նպատակով Սուրբ Զատիկի կերակրատեսակները պատրաստելիս անհրաժեշտ է խստորեն հետեւել սննդի պատրաստման անվտանգության կանոններին, հայտնում է ՀՀ Առողջապահության նախրարաությունը։ Դրանք են.

• Ձուկը մաքրել եւ լվանալ հոսող խմելու ջրով: Հում ձուկը եւ միսը մշակելիս օգտագործել խոհանոցային առանձին պարագաներ՝ կտրտման տախտակ, դանակ։ Օգտագործելուց հետո դրանք պետք է լվանալ տաք օճառաջրով, պարզաջրել եւ վերջում ողողել եռացած ջրով:

• Խոհանոցային առանձին պարագաներ օգտագործել նաեւ եփված եւ հում սննդամթեքը կտրտելիս, սառնարանում դրանք պահպանել առանձին տարաներում:

• Կանաչեղենը մաքրել եւ մոտ 10 րոպե լվանալ խմելու հոսող ջրով:

• Ձեռքերը մանրակրկիտ լվանալ օճառով եւ տաք ջրով սնունդ պատրաստելուց առաջ եւ պատրաստելու ընթացքում պարբերարար, հատկապես` հում մթերքը մշակելուց հետո, սնունդ ընդունելուց առաջ:

• Մթերքը ենթարկել պատշաճ ջերմային մշակման:

• Մթերքը պահել ճիշտ ջերմաստիճանում: Եփած մթերքը պետք է պահել սառնարանային պայմաններում՝ +2-+6 0C. եփած ձուկը ` 24- 48 ժամ, եփած միսը՝ 24-36 ժամ, եփած ձուն՝ 24 ժամ, եփած բրինձը՝ 12 ժամ, բանջարեղենային աղցանները՝ 18 ժամ։

• Ներկել պետք է չվնասված, ամբողջական կեղեւով ձուն: Նախքան եփելն այն պետք է լվանալ, այնուհետեւ եփել ջուրը եռալուց հետո առնվազն 10 րոպե:

• Ձվերը պետք է ներկել միայն բնական ներկերով: Ավանդաբար ընդունված է Զատկին ձուն ներկել կարմիր գույնով: Կարմիր գույն ստանալու լավագույն միջոցը կարմիր սոխի կճեպն է կամ տորոն բույսի կարմիր արմատները: Եթե մտադիր եք բազմագույն ներկված ձվեր դնել սեղանին, ապա այն կարելի է ստանալ բանջարեղենի ու համեմունքների օգնությամբ: Օրինակ դեղին գույն կարելի է ստանալ քրքումի կամ զաֆրանի եփուկի մեջ եփված ձուն եռացնելով: Թարմ ճակնդեղի հյութը ձուն կներկի վարդագույն, սպանախը՝ կանաչ, կարմիր կաղամբի միջոցով կարելի է ստանալ կապույտ ձու, ստեպղին օգտագործելիս կարելի է ստանալ նարնջագույն երանգ:

Հիշե՛ք.

Մեծ Պահքից պետք է դուրս գալ աստիճանաբար: Քանի որ բավական երկար ժամանակ միայն բուսական սնունդ օգտագործելով մարսողական համակարգում որոշակի փոփոխություններ են կատարվում, եւ մարդու օրգանիզմը հարմարվում է զուտ բուսական սննդի յուրացմանը: Միս եւ կենդանական ծագման այլ սնունդ յուրացվելու համար օրգանիզմին որոշակի ժամանակ է անհրաժեշտ: Ցանկալի է սկզբից օգտագործել առավել հեշտ յուրացվող մսամթերք՝ ձուկ եւ հավի միս, խուսափել յուղոտ տավարի, ոչխարի, խոզի մսից, սնկից:

Կարմիր գինին եւս պետք է օգտագործել չափավոր` օրվա ընթացքում 100-200մլ: Խուսափեք քաղցր գազավորված ըմպելիքների օգտագործումից: Դրանք պարունակում են մեծ քանակությամբ ազատ շաքար, արհեստական հավելումներ՝ ներկանյութեր, կոնսերվանտներ, համաբուրավետիչներ, որոնք վնասակար են առողջությանը: Զատիկի սեղանին ցանկալի է օգտագործել միայն բնական հյութեր:

Խորհուրդ է տրվում նաեւ կերակրատեսակները պատրաստել եփման, շոգեխաշման միջոցով, աղցանները լցոնել ոչ թե թթվասերով ու մայոնեզով, այլ` բուսայուղերով:

Հետևեք NEWS.am Medicine-ին Facebook-ում և Twitter-ում