Վաղ մանկությունում հավի ձվի եւ գետնանուշի օգտագործումը կարող է զգալիորեն նվազեցնել ավելի մեծ հասակում այդ մթերքների նկատմամբ ալերգիայի զարգացումը, ցույց է տվել նոր հետազոտությունը:
Վերլուծության ընթացքում Լոնդոնի Կայսերական քոլեջի գիտնականներն ուսումնասիրել են 146 հետազոտության տվյալներ, որոնք տեղեկություններ են ներառել ավելի քան 200 հազար երեխայի մասին:
Արդյունքները ցույց են տվել, որ այն երեխաները, որոնց սննդի մեջ 4-6 ամսականում ձու են ներառել, 40 տոկոսով ավելի հազվադեպ են տառապել այդ մթերքների հանդեպ ալերգիայից նրանց համեմատ, ովքեր ձու են կերել ավելի մեծ հասակում:
Իրենց հերթին, այն երեխաների մոտ, որոնց գետնանուշ պարունակող մթերքներ են տվել (օրինակ` գետնանուշի յուղ), երբ նրանք ընդամենը 4-11 ամսական են եղել, գետնանուշի նկատմամբ ալերգիայի զարգացման ռիսկը նվազել է 70 տոկոսով:
Սակայն եթե երեխաների մոտ արդեն իսկ սննդային ալերգիայի կամ էկզեմայի նշաններ կան, չարժե նրանց այդպիսի մթերքներ տալ, նշում են հետազոտողները: Սկզբի համար պետք է անպայման խորհրդակցել բժշկի հետ եւ համապատասխան հետազոտություն անցնել:
Գիտնականները նաեւ նշում են, որ չարժե, որ փոքր երեխաները գետնանուշն ամբողջությամբ օգտագործեն շնչահեղձության ռիսկի պատճառով: Դրա փոխարեն ավելի լավ է նրանց գետնանուշի յուղ տալ համտեսելու:
Հետազոտողները նաեւ ուսումնասիրել են, թե ալերգիայի ռիսկի վրա ինչպես է ազդում վաղ մանկությունում այնպիսի մթերքների օգտագործումը, ինչպիսին է կաթը, ձուկը, ընկույզը (նուշը) եւ ցորենը: Արդյունքում նրանք ոչ մի կապ չեն հայտնաբերել այդ գործոնի եւ տվյալ մթերքների հանդեպ ալերգիայի նվազման միջեւ:
Այնուամենայնիվ, նշում են մասնագետները, լրացուցիչ հետազոտություններ են անհրաժեշտ, որոնք կկարողանային հաստատել ստացված արդյունքները, որովհետեւ հավաքված տվյալները բավարար չեն: