10 հետաքրքիր փաստ Հայաստանում ծխելու մասին

Այսօր Հայաստանում նշվում է Ծխելու դեմ պայքարի ազգային օրը, որի կապակցությամբ NEWS.am Medicine-ի խմբագրությունը Ձեր ուշադրությանն է ներկայացնում ծխելու մասին հետաքրքիր փաստեր հայաստանյան վիճակագրությունից:

1. Հայաստանում 16 տարեկանից բարձր տղամարդկանց 53%-ը կանոնավոր ծխողներ են` ըստ 2016թ. անցկացրած հետազոտության: Ամենաշատ ծխողները 25-ից 30 տարիքային խմբում են. այդ տարիքի տղամարդկանց 60%-ը ծխում է:

2. Երեւանում կանանց 7-8%-ը ծխում է, մարզերում, սակայն, ծխող կանայք ավելի քիչ են: Հայաստանում ծխող կանանց թիվը, սոցիոլոգ Ահարոն Ադիբեկյանի տվյալներով, վերջին 20 տարիների ընթացքում աճել է 3 անգամ:

3. Հայաստանում 17-ամյա դեռահասների 26%-ը կանոնավոր ծխող է, 11 %-ը փորձել է ծխել առնվազն մեկ անգամ` ըստ «Դպրոցահասակ երեխաների առողջության վարքագիծը Հայաստանում» հետազոտության: Հետազոտությունը նաեւ ցույց է տվել, որ ծխող երեխաների մեծամասնությանը թվում է, թե ծխելն իրենց դարձնում է ավելի մեծ, ուժեղ եւ գրավիչ հասակակիցների աչքում: Ընտանիքը եւ շրջապատը եւս մեծ դեր են խաղում այս հարցում:

4. Հայաստանում 20 խոշոր հարկատուներից, Սպառողների ասոցիացիայի նախագահ Արմեն Պողոսյանի տվյալներով, միայն մեկն է արտադրում ինչ-որ բան, այն էլ՝ ծխախոտ:

5. Հայաստանում ծխախոտը մոտավորապես 5 անգամ էժան է, քան շատ այլ երկրներում: Ահարոն Ադիբեկյանի կարծիքով` դա պայմանավորված է ոչ միայն այն հանգամանքով, որ այդ ոլորտում հարկերը դեռեւս մեծ չեն, այլ նաեւ որ երբեմն օրիգինալի անվան տակ վաճառում են կեղծված ծխախոտներ` արտադրված անհայտ մեկի ավտոտնակում:

6. Եթե Հայաստանում ծխախոտը թանկանա, մոլի ծխողներից շատերը, իրենց կարծիքով, միեւնույն է չեն թողնի ծխելը. NEWS.am Medicine-ի հարցման համաձայն` հայ ծխողների մեծամասնությունը գերադասում է քաղցած մնալ, քան հրաժարվել ծխելուց:

7. Հայաստանում վաճառվող ծխախոտի տուփերի վրա դեռեւս պատկերված չեն սարսափելի նկարներ, որոնք ցույց կտան, թե ինչպիսի հիվանդություններ կարելի է ձեռք բերել ծխելու հետեւանքով:

8. Հայաստանում ամեն տարի գրանցվում է սրտանոթային հիվանդությունների մոտավորապես 55.000 նոր դեպք, որոնց հիմնական մեղավորներից մեկը համարվում է ծխելը:

9. Հայաստանում ամեն տարի գրանցվում է թոքերի քաղցկեղի 1300-1500 նոր դեպք: Օրինակ, 2015 թվականին երկրում գրանցվել է այդ տիպի քաղցկեղի 1353 նոր դեպք, իսկ վերջին 5 տարիների ընթացքում` 6180: Հիվանդների 90%-ը ծխողներ են:

10. Ըստ NEWS.am Medicine-ի հարցման տվյալների` Հայաստանի բնակչության 87%-ը կողմ է, որ հանրային վայրերում սահմանվի ծխելու արգելք: Սակայն նման արգելք, չգիտես ինչու, չի սահմանվում: