Աուտիզմի դեմ դեղամիջոցն իրականությո՞ւն է
16:09 20 հոկտեմբերի, 2016Աուտիզմի բուժման համար դեղամիջոցը տեսականորեն արդեն իրականություն է: Բոստոնի Մանկական հոսպիտալի աշխատակիցները աուտիզմի զոհերի բջիջներում թերություններ են հայտնաբերել, որոնց վրա կարելի է ազդել արդեն գոյություն ունեցող դեղամիջոցների օգնությամբ:
Աուտիզմի դեպքերի ավելի քան 50%-ը տուբերոզային սկլերոզ անվանումով գենետիկ խանգարումների հետեւանք է: Ներկայում դեղագործական շուկայում կիրառման պատրաստ երկու դեղամիջոց կա, որոնց օգնությամբ կարելի է ազդել այդ թերությունների վրա:
Հետազոտողները ենթադրում են, որ այդ վիճակն առաջանում է բջիջների պատերի կողմից իրենց միտոխոնդրիաները կրկնակի մշակելու գործընթացի ժամանակ ի հայտ եկող թերության պատճառով: Արդեն գոյություն ունեցող երկու դեղամիջոցները կարող են ազդել այդ թերության վրա: Դրանցից մեկն էպիլեպսիայի դեմ օգտագործվող կարբամազեպինն է, երկրորդը՝ ռապամիցինը (mTOR): Դրանց ազդեցությամբ անգործունակ նեյրոնները կարողանում են մաքրել վնասված միտոխոնդրիաները եւ դրանք համալրել առողջ միտոխոնդրիաներով, ինչը վերականգնում է նորմալ բջջային գործընթացները:
Հետազոտության հեղինակները ենթադրում են, որ թերապիայի նոր տեսակը հեռանկարային է ոչ միայն տուբերոզային սկլերոզի, այլ աուտիզմի տարատեսակ ձեւերի եւ նյարդային խանգարումների բուժման համար: Տեսականորեն աուտիզմի դեմ դեղամիջոցներ շուկայում արդեն կան:
Միտոխոնդրիաները մշտական մշակում են պահանջում. աուտոֆագիայի կամ ինքն իրեն ուտելու գործընթաց, որի ժամանակ բջիջները մարսում են վնասված կամ հնացած միտոխոնդրիաները՝ տեղ ազատելով առողջ փոխարինողների համար: Գիտնականներն ապացուցել են, որ աուտիզմի բազմաթիվ զոհերի օրգանիզմում աուտոֆագիան նորմալ չի կատարվում: Ներկայում կիրառվող երկու դեղամիջոցի օգտագործումն օգնել է լաբորատոր մկների մոտ վերականգնել այդ գործընթացը: Դրան հաջողվել է հասնել նաեւ վիրահատական միջամտությամբ՝ մուտացիայի ենթարկված գեների առողջ տարատեսակների տեղադրման հաշվին: