7 պատճառ, որ դդում պետք է ուտել ոչ միայն Հելոուինի ժամանակ
15:32 31 հոկտեմբերի, 2016Մարդկանցից շատերը դդում են ուտում միայն Հելոուինի տոնակատարության ժամանակ, չնայած դդումը շատ օգտակար է առողջության համար եւ մեծ թվով կարեւոր վիտամիններ ու հանքանյութեր է պարունակում: Սննդամթերքի մասնագետներ Կասանդրա Բարնսը եւ Մերիլին Գլենվիլը իրենց կարծիքն են հայտնել, թե ինչու է անհրաժեշտ դդում ուտել ամբողջ տարվա ընթացքում եւ ոչ թե միայն տոներին:
Նիհարել
Դդումը քիչ քանակությամբ կալորիաներ եւ ածխաջրեր է պարունակում, եւ դա է պատճառներից մեկը, որ այն պետք է ընդգրկել սննդաբաժնի մեջ: Այն նուրբ համ ունի, որը քաղցր կարտոֆիլ է հիշեցնում եւ հիանալի խավարտ է դառնում նիհարել ցանկացողների համար: Դրանից զատ, դդումը հագեցածության երկարատեւ զգացողություն է ապահովում՝ պաշտպանելով սառնարան վազելուց:
Առողջ մաշկ
Ինչպես գազարը եւ քաղցր կարտոֆիլը, դդումը եւս բետա կարոտին եւ այլ կարոտինոիդներ է պարունակում, որոնք նարնջի գույն են ապահովում: Բետա կարոտինն օրգանիզմում վերափոխվում է А վիտամինի, իսկ դա մաշկի առողջության եւ երիտասարդության ամենակարեւոր սնուցիչներից մեկն է: Ահա թե ինչու է դդումը մեր մաշկը ձիգ դարձնում եւ օգնում վնասվածքներից հետո արագ վերականգնվելուն:
Բնական հակաօքսիդանտներ
Դդմի կորիզը մեծ թվով բնական հակաօքսիդանտներ եւ չհագեցած ճարպաթթուներ է պարունակում: Դրանց մեջ հատկապես շատ է գամա տոկոֆերոլը՝ Е վիտամինի տարատեսակ, որը հզորագույն հակաօքսիդանտ է: Հետազոտությունները ցույց են տվել, որ այս բաղադրատարրը նվազեցնում է բորբոքային պրոցեսները եւ պաշտպանում քաղցկեղի որոշ տեսակներից:
Տրամադրություն
Եթե աշնանը ձեր տրամադրությունն առանց լուրջ պատճառի հաճախ է ընկնում, ձեր սննդաբաժնում ներառեք դդմի հավելմամբ լատե: Ուղեղի շատ պրոցեսներին մասնակցող մագնիումով հարուստ դդումը դեպրեսիայի եւ տագնապալի վիճակների կանխման լավ միջոց է:
Տեսողություն
Դդումում պարուակվող նյութերը օգնում են տեսողության լավացմանը եւ աչքերի դեգեներատիվ հիվանդությունների կանխմանը:
Սիրտ
Դդմի մեջ պարունակվող հակաօքսիդանտները նպաստում են ամբողջ օրգանիզմի պաշտպանությանը՝ ներառյալ սիրտը եւ արյունատար անոթները: Բջջանյութն օգնում է խոլեստերինի մակարդակը հսկողության տակ պահել, իջեցնում է զարկերակային ճնշումը՝ պաշտպանելով կաթվածից:
Իմունիտետ
Դդմի մեջ պարունակվում են A եւ C վիտամիններ, որոնք իմունիտետն են ամրացնում: Այս սնուցիչները մեզ ավելի կայուն են դարձնում մրսածության հիվանդությունների եւ գրիպի դեմ: