Ինչպես պետք է նախաճաշել՝ ավելի դյուրին նիհարելու համար
11:57 23 նոյեմբերի, 2016Նիհարել ցանկացող որոշ մարդիկ հրաժարվում են նախաճաշից՝ կարծելով, որ դա կօգնի կրճատել սննդակարգի ընդհանուր կալորիականությունը: Բայց իրականում, դիետոլոգ-էնդոկրինոլոգ Հասմիկ Աբովյանի պնդմամբ, նախաճաշից հրաժարվելը ոչ միայն չի օգնում նիհարել, այլ հակառակը, նպաստում է ավելորդ քաշ հավաքելուն: Իսկ ճիշտ, առողջ նախաճաշը կլավացնի նյութափոխանակությունն ու կօգնի ավելի արագ ազատվել ավելորդ կիլոգրամներից:
Իսկ ինչպիսի՞ն պետք է լինի նիհարել ցանկացող մարդու նախաճաշը:
Ոմանց թվում է, որ առավոտյան քաղցրեղեն ուտելը լավ գաղափար է, քանի որ ստացած կալորիաներն օրվա ընթացքում կարելի է կորցնել: Սակայն, մասնագետի կարծիքով, նախաճաշին պետք չէ բարձր գլիկեմիկ գործակվող մթերքներ ուտել, քանի որ նման նախաճաշից կարճ ժամանակ անց նորից քաղց կզգաք եւ ինչ-որ յուղոտ եւ կալորիական բան ուտելու ցանկություն կունենաք:
Ավելի ճիշտ է նախաճաշին բարդ ածխաջրեր պարունակող սնունդ ուտել (օրինակ՝ վարսակի շիլա, սակայն հարկավոր նախապատվությունը տալ հատիկավոր վարսակին), ինչպես նաեւ մի քիչ միրգ, բանջարեղեն եւ սպիտակուցներ (ձու կամ միս): Նման նախաճաշը, ըստ մասնագետի, երկար ժամանակ հագեցվածության զգացողություն կապահովի:
Եթե մարդն օրվա ընթացքում ուժեղ քաղցի զգացողություն չունենա եւ մի քանի անգամ ուտի՝ ոչ մեծ չափաբաժիններով, շատ չի ուտի եւ կկարողանա ավելի դյուրին նիհարել:
Ըստ դիետոլոգի՝ ոմանք պնդում են, որ չեն կարողանում առավոտյան նախաճաշել, բայց իրականում դա ընդամենը սովորույթի հարց է. ցանկացած մարդ կարող է վարժվել արթնանալուց հետո մեկ բաժակ ջուր խմեկ, իսկ 30-60 րոպե անց՝ նախաճաշել: Դա կօգնի վերահսկել քաշն ու պահպանել կազմվածքը՝ խուսափելով առողջական մի շարք խնդիրներից: