Կրծքով կերակրելը նվազեցնում է կանանց մոտ մետաբոլիկ համախտանիշի առաջացման հավանականությունը

Իրենց երեխաներին նվազագույնը 12 ամիս կրծքով կերակրող կանայք ավելի հազվադեպ են բախվում մետաբոլիկ համախտանիշին, քան այն կանայք, ովքեր երբեք  այդպես չեն կերակրել կամ կարճատեւ են կերակրել: Այս մասին նշված է Journal of Women's Health-ում հրապարակված հետազոտության մեջ:

Հետազոտությանը մասնակցել են 19-ից մինչեւ 50 տարեկան 4700 կորեուհիներ: Հետազոտողները պարզել են, որ կրծքով երկարատեւ կերակրելը նվազեցրել է մետաբոլիկ համախտանիշի առաջացման հավանականությունը. դա խանգարումների է համալիր է, որը ներառում է արյան բարձր ճնշումը, արյան մեջ գլյուկոզայի եւ խոլեստերինի մակարդակի բարձր մակարդակը: Հայտնի է, որ մետաբոլիկ համախտանիշը մեծացնում է սրտի ու գլխուղեղի կաթվածի եւ շաքարախտի վտանգը:

Հետազոտության մասնակիցներին 4 խմբի են բաժանել: Առաջին խմբի կանայք իրենց ամբողջ կյանքի ընթացքում կրծքով էին կերակրել 5 ամսից պակաս, երկրորդ խմբի կանայք՝ 6-ից մինչեւ 11 ամիս, երրորդ խմբի կանայք՝ 12-ից մինչեւ 23 ամիս, իսկ չորրորդ խմբի կանայք՝ 24 ամսից ավելի: Գիտնականները հայտնաբերել են, որ այն կանանց մոտ, ովքեր կրծքով են կերակրել 12 կամ ավելի ամիս, մետաբոլիկ համախտանիշի հավանականությունը էականորեն ցածր է եղել, քան այն կանանց մոտ, որոնք 12 ամսից պակաս են կրծքով կերակրել:

«Նորածիններին կրծքով կերակրելու առավելությունների մասին շատ բան է հայտնի, իսկ այս հետազոտությամբ պարզվել է, որ այն օգտակար է նաեւ մոր համար եւ նրան պաշտպանում է մետաբոլիկ համախտանիշից», - նշել է Journal of Women's Healthի գլխավոր խմբագիր, բժիշկ Սյուզան Քորնշթայնը: