Հնդկաստանում բժիշկները փրկել են ձկնորսին, որի բերանի մեջ ցատկած կենդանի ձուկը կոկորդում էր մնացել: Այս մասին գրում է Daily Mirror-ը:
Հնդկական Օրիսա նահանգի բնակիչը Պոդադիա գյուղի մերձակա լճակում 10 սմ-անոց ձուկ է բռնել, բայց չի կարողացել պահել ձեռքերի մեջ: Ձուկը ցատկել է տղամարդու բերանի մեջ եւ մնացել նրա կոկորդում:
Ձկնորսը չի կարողացել ինքնուրույն դուրս բերել ձուկը, որը խանգարել է շնչել եւ խոսել: Տուժածին հիվանդանոց են հասցրել, բայց տեղի բժիշկները չեն կարողացել օգնել նրան: Արդյունքում ստիպված են եղել ձկնորսին նահանգի մայրաքաղաք՝ Բհուբանեշվար տեղափոխել:
Բժիշկներից մեկի խոսքով՝ կոկորդում նկատելի էր ձկան պոչը: Տուժածին ցավազրկող են ներարկել, այնուհետեւ վիրահատական ունելիով դուրս բերել կենդանուն:
Լողակների հասցրած վնասվածքները տասն օրվա ընթացքում լավացել են: Այդ ընթաքում տղամարդը սնվել է քթի միջով անցկացված խողովակի օգնությամբ: