Հաշմանդամություն ունեցող մարդկանց մոտ ապագայում պրոթեզաօրթոպեդիկ պարագաներ կտրամադրվեն
15:28 25 մայիսի, 2017ՀՀ աշխատանքի և սոցիալական հարցերի նախարարի ժամանակավոր պաշտոնակատար Արտեմ Ասատրյանի ներկայացմամբ ՀՀ կառավարության 25.05.2017թ. հերթական նիստում ընդունվել է պրոթեզաօրթոպեդիկ և վերականգնողական պարագաների տրամադրման ծառայությունների անհետաձգելի գնմանը վերաբերող որոշումը:
Որոշման ընդունմամբ ՀՀ աշխատանքի և սոցիալական հարցերի նախարարությունը, մինչև դատարանի որոշման օրինական ուժի մեջ մտնելը, հնարավորություն կունենա օր առաջ ձեռք բերել հաշմանդամություն ունեցող անձանց համար նախատեսված լսողական սարքերի, պրոթեզաօրթոպեդիկ պարագաների տրամադրման և տեղադրման անհրաժեշտ չափաքանակի ծառայություններ:
2017թ. հունվար ամսից վերը նշված ծայությունները տրամադրելու նպատակով ՀՀ աշխատանքի և սոցիալական հարցերի նախարարությունը դեռևս 2016 թվականի դեկտեմբեր ամսին, «Գնումների մասին» օրենքի համաձայն, կազմակերպել էր պրոթեզաօրթոպեդիկ պարագաների տրամադրման և տեղադրման ծառայությունների, հաշմանդամների սայլակների և լսողական սարքերի գնման ընթացակարգեր 121 չափաբաժնով: Դրանցից 71 չափաբաժինների մասով նախարարության և համապատասխան կազմակերպությունների միջև պայմանագրեր կնքվել են, որոնց շրջանանկներում այսօր մատուցվում են ծառայություններ, մնացած 50 չափաբաժնի մասով գնահատման արդյունքները, մինչև անգործության ժամկետ սահմանելը, բողոքարկվել են մրցույթին մասնակցած կազմակերպությունների կողմից, և ներկայումս դատարանի որոշմամբ պայմանագրերի կնքումն արգելված է: