Մեծ Բրիտանիայում 6 երեխաների մայրը կեսարյան հատումից հետո պրակտիկանտի մեղքով մահացել է
14:56 2 հունիսի, 2017Վեց երեխաների մայրը ծննդաբերությունից հետո մեծ քանակությամբ արյուն կորցնելու հետեւանքով մահացել է: Ծնունդը փորձաշրջան անցնող վիրաբույժ է ընդունել: Բժշկի մեղքով, որը 45-ամյա Ռոզիդա Էտվարիին կեսարյան հատում է արել, կնոջ մոտ ուժեղ արնահոսություն է սկսվել: Դա Անգլիայի Քրոյդոնի հիվանդանոցում արձանագրված արդեն հինգերորդ դեպքն է: Նորածին երկվորյակները ողջ են մնացել: Այս մասին գրում է Daily Mail-ը:
Քանի որ Ռոզիդան պոտենցիալ մահացու հիվանդություն՝ պրեէկլամփսիա է ունեցել, իսկ երկվորյակներից մեկը՝ սրտի հետ կապված խնդիրներ, բժիշկները որոշել են կեսարյան հատում անել: Բայց վիրահատության ընթացքում պրակտիկանտ Լաթիկա Նարանգը չի կարողացել դադարեցնել արնահոսությունը, ինչի արդյունքում հիվանդը 6.5 լիտր արյուն է կորցրել:
Սրան հետեւել է հիվանդանոցի բուժանձնակազմի սխալը. նրանք կարծել են, թե կինն ընդամենը 3.5 լիտր արյուն է կորցրել, այդ պատճառով քիչ քանակությամբ արյան փոխներարկում են արել: Շարունակվող ներքին արնահոսության պատճառով նույն օրը Ռոզիդայի մոտ երկու անգամ սրտի կանգ է արձանագրվել:
«Գիտեի, որ հարկավոր է օգնության կանչել, բայց ժամանակ չկար: Փորձում էի պահպանել արգանդը»,- ասել է Լաթիկա Նարանգը:
Մանկաբարձության բաժանմունքի բժիշկները պետք է ավագ գործընկերներին մեծ քանակությամբ արյան կորստի մասին հայտնեին անմիջապես, բայց զանգահարել են երեք ժամ անց, երբ Ռոզիդան արդեն վերակենդանացման բաժանմունքում էր: Հիվանդանոցը համաձայնել է կնոջ ընտանիքին փոխհատուցում վճարել, բայց բոլոր մեղադրանքները հանվել են: Դատալսումները մինչեւ հիմա շարունակվում են: