Հայտնաբերվել է քաղցկեղից եւ ծերանալուց բնական պաշտպանության մեխանիզմը
19:15 7 հուլիսի, 2017Գերմանիայի Մոլեկուլյար կենսաբանության ինստիտուտի եւ Մայնցի Յոհաննես Գուտենբերգի համալսարանի հետազոտողները հայտնաբերել են մեխանիզմը, որը բջիջները պաշտպանում է վաղաժամ ծերանալուց եւ թույլ է տալիս կանխել ուռուցքների առաջացումը:
Մասնավորապես` գիտնականները հայտնաբերել են, որ ՌՆԹ-ի TERRA կոչվող մոլեկուլը կարողանում է վերականգնել չափազանց կարճ (կամ կոտրված) տելոմերները:
Տելոմերներ են կոչվում քրոմոսոմների ծայրերի հատվածները: Կյանքի ընթացքում բջիջների կիսվելու հետեւանքով տելոմերներն աստիճանաբար սկսում են փոքրանալ` գործարկելով ծերացման պրոցեսը: Այսինքն` տելոմերները որքան կարճ են եւ բջիջները քիչ են կիսվում, այնքան օրգանիզմն արագ է թառամում:
Դրա հետ մեկտեղ տելոմերների փոքրացումը քաղցկեղի դեմ պաշտպանական մեխանիզմ է, այլապես չարորակ բջիջները կարող էին անսահմանափակ քանակով բազմանալ:
«Կարեւոր է քաղցկեղի կանխարգելման եւ ծերացման միջեւ հավասարակշռությունը, նաեւ այն բանի ըմբռնումը, թե դրան հատկապես ինչպես են հասնում»,- ասում է պրոֆեսոր Բրայան Լուկը:
Գիտնականները հանգել են այն եզրակացության, որ հավասարակշռության պահպանումը օգնում է TERRA-ին` ՌՆԹ-ի տեսակին, որը կարճ տելոմերների վրա է կուտակվում ԴՆԹ-ի հետ միանալու ճանապարհով եւ բջջին ահազանգում է, որ քրոմոսոմի ծայրերի հատվածները պետք է վերանորոգվեն` բջիջների հետագա կիսվելու համար:
Հստակեցվում է, որ հետազոտողները պարզել են, թե խմորասնկերում ինչպես են ճանաչվում եւ վերականգնվում քրոմոսոմների կարճացված ծայրերը: Սակայն տելոմերներ եւ TERRA ունեն գծային քրոմոսոմներով բոլոր օրգանիզմները, այդ պատճառով առաջիկայում հետազոտողները նախատեսել են ՌՆԹ-ի ֆունկցիաներն ուսումնասիրել մարդկանց բջիջներում: