Ինչպե՞ս մեծ տարիքում երկարացնել կյանքը

21:37   13 հուլիսի, 2017

Ամերիկյան գիտնականները նշել են մեծ տարիքում կյանքը երկարացնելու արդյունավետ միջոցը: Մասնագետներն ապացուցել են, որ աստիճանաբար առողջ սննդակարգի անցումը, որը հիմնված է հատիկավոր մթերքների, մրգի, բանջարեղենի, ընկուզեղենի եւ ձկան վրա, զգալիորեն նվազեցնում է վաղաժամ մահվան վտանգը:

Ընդ որում՝ սննդակարգի փոփոխության մոդելն արդյունավետ է ինչպես երիտասարդների, այնպես էլ տարեցների համար, պարզել են Հարվարդի համալսարանի (ԱՄՆ) հետազոտողները:

Փորձագետները ենթադրում են, որ միջերկրածովյան դիետան եւ DASH (Dietary approaches to stop hypertension) մոտեցումն ամենաընդունելի սննդակարգն են:

«Սա առաջին հետազոտությունն է, որը ցույց է տալիս, որ նույնիսկ սննդակարգի որակի աննշան բարելավումը, որին պետք է հետեւել գոնե տասը տարի, զգալիորեն կրճատում է վաղաժամ մահվան վտանգը, իսկ սննդակարգի որակի վատթարացումը կարող է մեծացնել այդ վտանգը»,- ասել է Օհայոյի համալսարանի դոցենտ Մերսեդես Սոտոս-Պրիետոն:

Նա գործընկերների հետ վերլուծել է սննդի մոդելի փոփոխությունների եւ վերջին տարիներին մարդկանց առողջական վիճակի միջեւ կապը: 12-ամյա (1986-1998 թ.թ.) հետազոտությանը 74 հազար մարդ է մասնակցել:

Պարզվել է, որ, օրինակ, օրական կարմիր մսի մեկ չափաբաժնի փոխարինումը ընկուզեղենով կամ լոբազգիներով 8-17%-ով նվազեցնում է սիրտ-անոթային հիվանդությունների առաջացման վտանգը: Մինչդեռ «վնասակար» մթերքների կանոնավոր օգտագործումը 6-12%-ով մեծացնում է վաղաժամ մահվան վտանգը:

Միջերկրածովյան դիետան ենթադրում է մեծ քանակությամբ միրգ, բանջարեղեն, ընկուզեղեն, լոբազգիներ, հատիկավորներ, ձիթապտղի ձեթ պարունակող սննդակարգ, ինչպես նաեւ չափավոր քանակությամբ ձուկ, գինի, կաթնամթերք եւ սահմանափակ քանակությամբ կարմիր մսի օգտագործում:



© NEWS.am Medicine