Ինչպես խուսափել տհաճ անակնկալներից՝ բնության գրկում հանգստանալիս

Ամռանը հաճելի է շաբաթվա ավարտն անցկացնել բնության գրկում: Սակայն երբեմն այն կարող է ավարտվել առողջության հետ կապված խնդիրներով, ինչը կխափանի հանգիստը, զգուշացնում է Հայաստանի առողջապահության նախարարույունը։

Նման իրավիճակներից խուսափելու եւ հանգիստը լիարժեք վայելելու համար պետք է հետեւել մի քանի պարզ կանոնի: Բնության գրկում հանգստանալիս նախ անհրաժեշտ է պաշտպանվել միջատներից, քանի որ դրանք կարող են վարակիչ հիվանդություններ տարածել։ Միջատներից պաշտպանվելու համար խորհուրդ է տրվում բնության գրկում օգտագործել միջատներին վանող նյութեր եւ կրել բաց գույնի երկարաթեւ հագուստ։

Բացի այդ, խորհուրդ է տրվում.

• շուտ փչացող մթերքը տեղափոխել եւ պահել սառնարան-պայուսակներում
• չգնել անհայտ ծագման միս-մսամթերք եւ այլ շուտ փչացող մթերք` այն վայրերից, որոնք նախատեսված չեն առեւտրի համար եւ չունեն համապատասխան ուղեկցող փաստաթուղթ
• խորհուրդ չի տրվում վերցնել կաթնամթերք, ապխտած մթերք, ձու եւ կրեմային հրուշակեղեն, քանի որ դրանք նպաստավոր միջավայր են հանդիսանում մանրէների բազմացման համար
• խմելու համար օգտագործել շշալցված ջուր
• կերակրատեսակների պատրաստման ժամանակ հում եւ պատրաստի մթերքի համար օգտագործել առանձին խոհարարական պարագաներ՝ դանակներ, ափսեներ, տախտակներ: Շատ կարեւոր է հետեւել, որպեսզի մսամթերքից եւ այլ հում մթերքից հոսող հեղուկը չաղտոտի պատրաստի սննդատեսակները (աղցաններ, միրգ եւ բանջարեղեն եւ այլն)
• սնունդը, մինչեւ ուտելը, ուտելու ժամանակ եւ հետո պետք է պաշտպանված լինի միջատներից, կրծողներից եւ այլ կենդանիներից, որոնք հիվանդածին մանրէների փոխանցողներ են: Սնունդը անպայման պահել լավ փակվող տարաներում կամ փաթեթավորել պոլիէթիլենային թաղանթներով կամ փայլաթիթեղով
• խորովածի համար օգտագործել պատրաստի փայտածուխ, սննդի համար՝ միանվագ օգտագործման ափսեներ եւ այլ պարագաներ
• սնունդը, խորովածը պատրաստել անմիջապես ուտելուց առաջ: Պետք է հիշել, որ մանղալի վրա պատրաստված միսը ոչ միշտ է դառնում անվտանգ օգտագործման համար: Միսը համարվում է եփված, եթե կտրելիս չի հոսում արյունային հեղուկ: Խորովածի մսի պատրաստման ժամանակ առատորեն օգտագործել համեմունքներ՝ կարմիր եւ սեւ պղպեղ, մանանեխ, քրքում, ուրց եւ այլն, քանի որ դրանք օժտված են ախտահանող հատկություններով
• պահպանել անձնական հիգիենայի կանոնները՝ ձեռքերը լվանալ սնունդ պատրաստելուց եւ ուտելուց առաջ՝ ցանկալի է օճառով: Ձեռքերը, սպասքը, միրգն ու բանջարեղենը լվանալ խմելու համար նախատեսված կամ շշալցված ջրով
• չօգտվել ջրի պատահական աղբյուրներից: