4 մթերք, որոնք վնասակար են մաշկի համար
16:34 24 օգոստոսի, 2017Սննդակարգն ազդում է ոչ միայն մարդու առողջության եւ ինքնազգացողության վրա, այլեւ նրա արտաքինի. որոշ մթերքներ օգնում են մաշկն առողջ եւ գեղեցիկ պահել, որոշներն էլ, հակառակը, նպաստում են դրա ծերացումն արագացնելուն:
Ձեր ուշադրությանն ենք ներկայացնում մի քանի մթերքներ, որոնք, մասնագետների կարծիքով, վնասակար են մաշկի համար:
Շաքարավազ
Շաքարավազն ամենավտանգավոր մթերքներից է համարվում՝ ինչպես մաշկի, այնպես էլ առողջության համար ընդհանրապես: Այս մթերքի հաճախակի օգտագործումն արագացնում է մաշկի ծերացման գործընթացը:
Estee Lauder-ի լաբորատորիայից գիտնականների պնդմամբ՝ հենց շաքարավազն է պատասխանատու մաշկի ծերացման նախանշաններից 40-50%-ի համար, օրինակ՝ կնճիռների առաջացման, առողջ գույնի եւ առաձգականության կորստի: Գիտնականների խոսքով՝ դա կապված է այն հանգամանքի հետ, որ շաքարավազն օրգանիզմում գործընթաց է առաջացնում, որի դեպքում գլյուկոզայի մոլեկուլները միավորվում են բջիջների սպիտակուցների հետ եւ ոչնչացնում դրանք:
Շատ համեմված, կծու եւ աղի սնունդ
Շատ համեմված եւ կծու սնունդը կարող է հաճելի համ ունենալ, բայց մեծացնում է մաշկի վրա բշտիկների եւ բորբոքային պրոցեսների առաջացման վտանգը: Ինչ վերաբերում է աղի սննդին. դրա սիրահարների մոտ, որպես կանոն, այտուցներ եւ ուռուցքներ են առաջանում, աչքերի տակ պարկեր եւ բշտիկներ:
Յուղոտ ուտեստներ
Մասնագետների խոսքով՝ յուղոտ ուտեստների հանդեպ սերը խախտում է օրգանիզմում ջրային հավասարակշռությունը, ինչի հետեւանքով մաշկը բավարար քանակությամբ օգտակար նյութեր չի ստանում ու կնճռոտ եւ բորբոքված է դառնում:
Կաթ
Կարծիք կա, որ կաթը նույնպես այնքան էլ օգտակար չէ մաշկի համար, քանի որ կաթի մեջ առկա բաղադրիչներն ակտիվացնում են մաշկային ճարպի արտադրությունը: Այդ պատճառով կաթնամթերքի փոխարեն գիտնականները խորհուրդ են տալիս կաթնաթթվային մթերքներ օգտագործել: