18:17 9 սեպտեմբերի, 2017
Էխոկարդիոգրաֆիան հետազոտության ոչ ինվազիվ մեթոդ է, որը կիրառվում է սրտի եւ խոշոր անոթների կառուցվածքն ու գործառույթները ստուգելու համար։ Այդ հետազոտության միջոցով հղիության 18-22-րդ շաբաթում կարելի է պարզել պտղի սրտի շատ բնածին արատներ։
Մանկական հայտնի սրտաբան Կարեն Քուրդովը NEWS.am Medicine-ի թղթակցի հետ զրույցում պատմեց պտղի սրտի արատների հավանակության հիմնական գործոնների մասին։ Եթե հղի կնոջ մոտ առկա են ներքոնշյալ երեւույթներից թեկուզ մեկը, պետք է անպայման էխոկարդոգրաֆիայի դիմել։
- Հղին, նրա ամուսինը կա երեխաներից մեկն ի ծնե սրտի արատով է տառապում։ Մասնագետի խոսքով՝ նման ընտանիքներում սրտի արատով երեխաների ծնվելու հավանականությունը 3-5 անգամ ավելի մեծ է, քան ընտանիքներում, որտեղ նման անձինք չկան։
- Հղին տառապում է այնպիսի հիվանդություններով, ինչպես շաքարախտը, ֆենիլետոնուրիան, էպիդեմիկ պարօտիտը կամ համակարգային հիվանդություններով՝ ինչպես համակարգային կարմիր գայլախտը։
- Հղի կինն ընդունել է ջղաձգումների, սրտանոթային հիվանդությունների դեմ դեղորայքներ հակաբեղմնավորիչներ եւ լիթիումի պատրաստուկ։
- Պտղի մոտ քրոմոսոմային խանգարում է առկա (ցանկացած):
- Ուլտրաձայնային հետազոտության ժամանակ բժիշկը կասկածում է, որ պտղի սիրտն անոմալիա ունի։
- Պտղի սիրտն արագ է բաբախում (առիթմիա)։
- Կինը նախկինում վիժումներ է ունեցել։
- Հղի կինը ծխում է։ Ծխելը պտղի մոտ սրտի արատի զարգանալու ռիսկի գործոն է համարվում։
Մասնագետը նշեց, որ սրտի որոշ արատներ կյանքի հետ անհամատեղելի են եւ եթե դրանք հայտնաբերվում են, հղիությունը խորհուրդ է տրվում ընդհատել։ Սակայն արատներ կան, որոնք երեխայի կյանքին չեն սպառնում։ Բայց պտղի մոտ դրանց առկայության մասին ցանկալի է նախապես իմանալ՝ ճիշտ հղիություն տանելու եւ հետծննդյան շրջանում ճիշտ խնամք կազմակերպելու համար։