Նիգերիայում ավելի քան 2600 մարդու մոտ խոլերա են կասկածում. ԱՀԿ
16:43 18 սեպտեմբերի, 2017Նիգերիայում, ԱՀԿ տվյալներով, վերջին մի քանի ամիսների ընթացքում խոլերայից մահվան 48 դեպք է գրանցվել, եւս մոտ 2600 մարդու մոտ կասկածում են այդ հիվանդությունը։
«Նիգերիայի հյուսիսային հատվածում վերջին ամիսներին խոլերայի կասկածանքով 2600 դեպք է քննվել, որոնցից 48-ի դեպքում՝ մահվան ելքով։ Այս շրջանում տեղահանված մարդիկ են ապրում, սակայն հիվանդությունը տարածվում է դեպի հյուսիս՝ Չադ»,– լրագրողներին ասել է ԱՀԿ պանդեմիկ եւ էպիդեմիկ հիվանդությունների դեպարտամենտի փորձագետ Դոմինիկ Լեգրոսը։
Նրա խոսքով՝ Նիգերիայում հիվանդության համաճարակը նոր է սկսվել, եւ ԱՀԿ–ն փորձում է վերահսկողություն ստանալ դրա նկատմամբ։ «Մենք պլանավորում ենք 900 հազար մարդու պատվաստել թե՛ փախստականների ճամբարում, թե՛ հարեւան շրջաններում»,– ասել է Լեգրոսը։
Նա նշել է, որ այս դեպքում ԱՀԿ–ն ակտիվորեն ազդել է հիվանդության կանխման վրա։