Ե՞րբ է Ալցհեյմերի հիվանդությունը սկսում փոխել մարդու անձը

Ե՞րբ ու ինչպե՞ս է Ալցհեյմերի հիվանդությունը սկսում փոխել մարդու անձը։ Կարելի է արդյոք անձի փոփոխություններով կանխատեսել այդ հիվանդության զարգացումը։ Այս հարցերի պատասխանները փորձել են գտնել Florida State University College of Medicine (ԱՄՆ) համալսարանի գիտնականները՝ Անտոնիո Տերաչիանոյի ու Անգելինա Սուտինի ղեկավարությամբ։

Հետազոտության շրջանակում, որը հրապարակվել է JAMA Psychiatry ամսագրում, մասնագետներն ավելի քան 2000 մարդուց բաղկացած խմբում ուսումնասիրել են անձի փոփոխությունները, որոնք կապակցված են թուլամտության հետ։ Կամավորների միջին տարիքը 62 տարեկանն է եղել։ Դիտարկումների ընթացքում մասնակիցների շուրջ 5 տոկոսի մոտ զարգացել են չափավոր մտավոր խանգարումներ։ 12․5 տոկոսի մոտ՝ թուլամտություն, որը դեպքերի մեծ մասում արտահայտվել է Ալցհեյմերի հիվանդության ձեւով։

Այդ մարդկանց մասին տվյալները համեմատվել են առողջ կամավորներից բաղկացած խմբի տվյալների հետ։ Արդյունքում գիտնականները եզրակացրել են, որ Ալցհեյմերի հիվանդություն նախապես կասկածելը շատ բարդ է, քանի որ այդ մասին նախազգուշացնող անձնային փոփոխություններ տեղի չեն ունենում։