Լեւոն Ալթունյանը խոստացավ լուծել ուռուցքաբանության ֆինանսավորման հարցը

Այսօր Հայաստանի բյուջեում չկա այնքան գումար, որպեսզի պետությունը կարողանա հոգալ սոցիալապես անապահով վիճակում գտնվող ուռուցքային հիվանդների բուժման ծախսերը, սակայն, առաջիկայում լուծում կտրվի նաեւ այդ հարցին։ Այս մասին, այսօր՝ հոկտեմբերի 6-ին, հրավիրված ասուլիսի ժամանակ հայտնեց ՀՀ առողջապահության նախարար Լեւոն Ալթունյանը։

Նա նշեց, որ այն հասարակությունում, որն անտեսում է առողջ ապրելակերպի կանոնները, այս թվում՝ ծխելու, ֆիզիկական ակտիվության անհրաժեշտության, մսամթերք եւ կաթնամթերք չարաշահելու արգելքները, ուռուցքային հիվանդությունների աճ է գրանցվում։

Ինչ վերաբերում է քաղցկեղի բուժմանը, ապա, ըստ նախարարի, միջին հիվանդի բուժման արժեքը հասնում է 20-30 հազար դոլարի։ «Բյուջեում այսօր այդքան գումար չկա։  Սակայն, մենք նախատեսում ենք ունենալ այդ գումարները՝ 3-5 տարվա հեռանկարով, երբ ամբողջությամբ կսկսեն գործել ապահովագրական ծրագրերը։ Մենք հույս ունենք, որ վճարունակ բնակչությունը ապահովագրական վճարների հաշվին կկարողանա ձեւավորել այն ֆոնդը, որից կօգտվի», - հայտնեց Լեւոն Ալթունյանը։

Նախարարը նշեց, որ այս քայլերով կտնտեսեն այն գումարները, որոնք այսօր ծախսվում են ամբողջ 3 միլիոն բնակչության համար, եւ դրանց միջոցով հնարավոր կլինի հոգալ անվճարունակ կամ սոցիալակապես ծանր վիճակում գտնվող բնակչության հոգսերը։