ԱՀԿ-ի կանխատեսումներով այս տարի կշրջանառվի գրիպի AH1 ենթատեսակը։ Չնայած գրիպի սեզոնն արդեն սկսվել է, Հայաստանում այդ վիրուսը դեռեւս չի շրջանառում: Այս մասին ասվել է Առողջապահության համաշախարհային կազմակերպության աջակցությամբ Երեւանում կազմակերպված գրիպի տարեկան աշխատաժողովի ժամանակ, հայտնում է ՀՀ առողջապահության նախարարությունը։
Աշխատաժողովին մասնակցել են Երեւանի եւ մարզերի համաճարակաբաններ, վարակաբաններ, առողջության եւ սոցիալական ապահովության վարչությունների ներկայացուցիչներ:
Առաջին անգամ տարեկան աշխատաժողովին մասնակցել են նաեւ անասնաբույժներ: Նրանց մասնակցության անհրաժեշտությունը բխել է զոոնոզ գրիպի արդիականությունից, քանի որ ինչպես եվրոպական տարածաշրջանի, այնպես էլ հարավ-ասիական երկրներում ներկայումս այն գերակա խնդիր է։ Այն արձանագրվում է թե՛ թռչունների, թե՛ մարդկանց շրջանում։
Ներկայացվել են զեկույցներ ինչպես հանրապետությունում 2016-2017թթ. գրիպի սեզոնի իրավիճակի, այնպես էլ` միջազգային նորությունների հիման վրա 2017-2018թթ. գրիպի սեզոնի նախապատրաստական եւ իրականացվելիք աշխատանքների մասին:
Գրիպի 2016-2017 թվականների սեզոնի ընթացքում իրականացված աշխատանքները քննարկելիս վերհանվել են նախորդ սեզոնի ընթացքում առաջացած բոլոր խնդիրները եւ հիմնահարցերը։ Նախանշվել են հնարավոր լուծումներ՝ 2017-2018 թվականների գրիպի սեզոնի ժամանակ դրանցից խուսափելու համար:
Քննարկվել են նաեւ գրիպի դետքային համաճարկաբանական հսկողության վերաբերյալ հարցեր:
Ներկայացվել է արդեն իսկ գործող գրիպի համաճարակաբանական եւ լաբորատոր հսկողության էլեկտրոնային բազան, որի հիման վրա, որպես գլոբալ ձեռքբերում, տրամադրվել է գրիպի շաբաթական տեղեկագիրը: Այն հետագայում թույլ կտա «իրական ժամանակում» հիվանդացության շեմերի, հիվանդացության ծանրության եւ ակտիվության համաճարակաբանական համապատասխան վերլուծություններ իրականացնել:
Զեկույցներ են ներկայացվել նաեւ անասնաբուժական ոլորտի մասնագետների կողմից՝ կենդանիների, մասնավորապես՝ թռչունների շրջանում իրականացվող անասնահամաճարակաբանական հսկողության վերաբերյալ:
Աշխատաժողովին մասնակցել են ՀՀ առողջապահության նախարարի տեղակալ Սերգեյ Խաչատրյանը, Առողջապահության համաշխարհային կազմակերպության հայաստանյան գրասենյակի ղեկավար Եգոր Զայցեւը, ՀՀ գյուղատնտեսության նախարարության սննդամթերքի անվտանգության պետական ծառայության անասնաբուժական տեսչության պետ Հովհաննես Մկրտչյանը։