Վիտամին D-ն նպաստում է այրվածքների արագ ապաքինմանը
18:58 6 նոյեմբերի, 2017Վիտամին D-ի բարձր մակարդակն օրգանիզմում թույլ է տալիս, որ հիվանդներն ավելի արագ ապաքինվեն ծանր այրվածքներից հետո։ Նման եզրակացության են հանգել Բիրմինգհեմի Բորբոքման ու ծերացման ինստիտուտի գիտնականները։ Հետազոտության արդյունքները ներկայացվել էին Հարոգեյթում էնդոկրինոլոգիայի միության ամենամյա կոնֆերանսի ժամանակ, հայտնում է EurekAlert պորտալը։
Այրվածքներից տուժած մարդիկ շատ խոցելի են զանազան ինֆեկցիաների հանդեպ։ Վաղուց է հայտնի, որ վիտամին D-ն հակաբակտերիալ գործողություն ունի, դրա համար էլ գիտնականները ենթադրել են, որ այն կարող է նպաստել այրվածքների ապաքինմանը։
Այս հիպոթեզը ստուգելու համար Բիրմինգհեմի Բորբոքման ու ծերացման ինստիտուտի աշխատակիցները ավելի քան մեկ տարի գնահատել են վերականգնման պրոցեսը ծանր այրվածքներով հիվանդների մոտ ու հետեւել, թե ինչպես է այն կապակցված վիտամին D—ի մակարդակի հետ։ Պարզվել է, որ այդ վիտամինի ավելի բարձր պարունակությունը կապակցված է վերքերի առավել հաջող ապաքինման ու սպիների նվազ քանակության հետ։
Միաժամանակ պարզվել է, որ այրվածքներն ինքնին հանգեցնում են վիտամին D-ի մակարդակի նվազմանը օրգանիզմում։ Դրա համար էլ վնասվածք ստանալուց անմիջապես հետո այդ վիտամինի հավելումն ավելացնում է ապաքինման հավանականությունը։