Աշնանն ու ձմռանը պետք է ճշգրտել ընդունվող հորմոնների չափաբաժինները․ մասնագետ

Հորմոնալ դեղորայք ընդունող հիվանդներին ցուրտ եղանակներին երբեմն խորհուրդ է տրվում փոխել այդ դեղամիջոցների չափաբաժինները, վստահեցնում է էնդոկրինոլոգ ու դիետոլոգ Հասմիկ Աբովյանը։ 

Երբ լուսային օրվա տեւողությունը նվազում է, դա որպես կանոն ազդում է ոչ միայն ինքնազգացողության ու տրամադրության, այլեւ մարդու հորմոնալ համակարգի վրա։ Առողջ մարդու մոտ այդ փոփոխությունները գրեթե աննկատ են ու օրգանիզմն ինքն է կարգավորում անհրաժեշտ հորմոնների արտադրությունը անհրաժեշտ քանակությամբ։ 

Սակայն եթե հիվանդի մոտ օրինակ հիպոտիրեոզ է ու նա ստանում է փոխարինող թերապիա՝ այն դեղամիջոցները, որոնք նա ամռանն էր ստանում, որոշ դեպքերում կարող են բավարար չլինել ձմռանը, երբ վահանաձեւ գեղձի հորմոնների կարիքն օրգանիզմում աճում է։ 

Մասնագետը հորմոնալ բուժում ստացող հիվանդներին խորհուրդ է տալիս աշնանն ու ձմռանը կապ պահպանել իրենց բուժող բժշկի հետ, որպեսզի վերջինս կարողանա անհրաժեշտության դեպքում փոփոխել բուժումը։ 

Հիշեցնենք, որ վահանաձեւ գեղձը լուրջ դեր է կատարում օրգանիզմի մեջ էներգետիկ պրոցեսների կանոնակարգման հարցում ու եթե այն ինչպես հարկն է չի աշխատում ու չի արտադրում անհրաժեշտ քանակությամբ հորմոններ, մարդն ավելի մրսկան ու նյարդային է դառնում։ Դա հատկապես ակտուալ է աշնանն ու ձմռանը։