Արցախի 10 բժիշկներ ստացել են ՌԴ ԲՏԳԱ ակադեմիկոսի կոչում
14:50 20 դեկտեմբերի, 2017Արցախի Հանրապետությունում բացվեց Ռուսաստանի Դաշնության Բժշկատեխնիկական գիտությունների ակադեմիայի (ԲՏԳԱ) մասնաճյուղ, եւ արցախցի 10 գիտնական բժիշկներ այսօր՝ դեկտեմբերի 20-ին, դարձել են այս մասնաճյուղի անդամներ: Այս մասին լրագրողներին հայտնեց Հայաստանի Կուրորտաբանության եւ ֆիզիկական բժշկության ինստիտուտի տնօրեն Բենիկ Հարությունյանը:
Նրա խոսքով՝ մասնաճյուղի բացումը հնարավոր դարձավ սեպտեմբերի 12-15-ին Երեւանում եւ Ստեփանակերտում միջազգային գիտաժողովի անցկացումից հետո, որին մասնակցել էին նաեւ Ռուսաստանից գիտնականներ: Նրանցից մի քանիսը, անտեսելով Ադրբեջանի սպառնալիքները, հաճույքով Արցախ մեկնեցին, որպեսզի գիտաժողովին մասնակցեն եւ ծանոթանան տեղի մասնագետների հետ:
Արցախյան մասնաճյուղի տնօրեն է դարձել Արցախի առողջապահության նախարար Կարինե Աթայանը: Մասնաճյուղի բացմանը նվիրված միջոցառման ժամանակ նա նշեց, որ սա, իր կարծիքով, շատ կարեւոր նախաձեռնություն է, որը Արցախին թույլ կտա միջազգային մակարդակ դուրս գալ որպես ինքնուրույն միավոր:
Մասնաճյուղի անդամներ են դարձել Գարիկ Ազիրյանը, Էդիկ Ղուկասյանը, Օֆելյա Դադայանը, Անահիտ Լալայանը, Զոյա Մաղաքելյանը, Ալյոշա Մաղաքելյանը, Գագիկ Օհանյանը, Մարինե Թեւոսյանը եւ Արմեն Խաչատրյանը:
ՌԴ ԲՏԳԱ փոխնախագահ Մարլեն Բոստանջյանն իր հերթին նշեց, որ այս մասնագետները կկարողանան մասնակցել Բժշկակտեխնիկական ակադեմիայի ինչպես Ռուսաստանում, այնպես էլ արտասահմանում անցկացվող աշխատանքներին: Բոստանջյանը հիշեցրեց, որ Ակադեմիան ամեն տարի գիտաժողովներ է անցկացնում ոչ միայն Ռուսաստանում, այլ նաեւ ուրիշ երկրներում: