Սա նվազագույնն է, որ կարող ենք նրանց համար անել. Հայ աստղերը այցելել են հիվանդ երեխաներին (ֆոտո)

Ծանր հիվանդությունների դեմ պայքարող երեխաները դրական էմոցիաների կարիք շատ ունեն, քանի որ ամբողջ օրն անցկացնում են հվանդասենյակում: Նրանց ժամանակ առ ժամանակ այցելելը եւ ոչ մեծ նվերներ տալը այն վնազագույնն է, որ նրանց համար կարող են անել մեծահասակները, պնդում է հայ երգիչ, շոումեն եւ կոմիկ Արամ MP3-ն:

«Սա նվազագույնն է, որ կարող ենք նրանց համար անել: Եթե մեզ տեսնելով՝ երեխաներն ուրախանում են, մենք պետք է ավելի հաճախ այստեղ գանք, քանի որ դրական էմոցիաները երեխաների համար օգտակար են»,- լրագրողների հետ զրույցում նշեց նա:

Հայկական շոու բիզնեսի մյուս աստղերի հետ Արամ MP3-ն այսօր՝ դեկտեմբերի 26-ին, այցելել է «Մուրացան» բժշկական կենտրոնի քիմիաթերապիայի բաժանմունքում բուժում ստացող երեխաներին: Ձմեռ պապի, Ձյունանուշի, ուրախ ծաղրածուների եւ հայտնի մուլտֆիլմերի հերոսների ուղեկցությամբ նրանք շփվել են երեխաների հետ եւ նրանց նվերներ բաժանել:

Հայ հայտնի դերասան Մկրտիչ Արզումանյանը (Մկո) այսօր բուժվող երեխաների մեծամասնության հետ առաջին անգամ չի շփվում. նրա խոսքով՝ ինքն այս հիվանդանոցում հաճախ է լինում եւ շատերին արդեն անունով է ճանաչում, որոնց համար անվանական նվերներ էր պատրաստել: Նրա խոսքով՝ ինքը չգիտեր, թե այս երեխաները հատկապես ինչ նվերներ կցանկանային, բայց փորձել է այնպիսի նվերներ ընտրել, որոնք, իր կարծիքով, նրանք կհավանեին:

«Նույնիսկ եթե մեզ համար դա դժվար է, մենք պետք է ամբողջ ժամանակ ժպտանք, որպեսզի մյուսների մեջ դրական էմոցիաներ արթնացնենք»,- ասաց դերասանը:

«Մուրացան» ԲԿ քիմիաթերապիայի կլինիկայի ղեկավար Արմեն Ավագյանը լրագրողների հետ զրույցում ասաց, որ այս բաժանմունքում տարեկան բուժում է ստանում մոտ 25-30 երեխա: Այսօրվա դրությամբ՝ բաժանմունքում 7 երեխա կա, եւ նրանք բոլորն այստեղ բավական երկար ժամանակ են անցկացրել. ոմանք մի քանի ամիս են բուժվում, մյուսներին անհրաժեշտ է բուժել 1 տարի կամ գուցե ավելի երկար:

Բժշկի խոսքով՝ այս երեխաների մեծ մասը ամանորյա տոները հիվանդանոցում կանցկացնի: Իսկ այսօրվա նման անակնկալները նրանց կօգնեն իրենց ավելի լիարժեք զգալ, զգալ, որ նույնիսկ հիվանդանոցում լինելով՝ նրա պատերից դուրս ընթացող կյանքից չեն կտրվում: