Բժիշկները հեռացրել են մոծակի խայթոցից գոյացած 14 կիլոգրամանոց ուռուցքը (ֆոտո)
23:48 15 փետրվարի, 2018Հնդկաստանի Քերալա նահանգի Քոչին քաղաքում բժիշկները վիրահատել են 46-ամյա տղամարդու, որի ազդրին մոծակի խայթոցից հետո 14 կիլոգրամանոց ուռուցք էր գոյացել: Ինչպես հայտնում է The Times of India-ն, երբ հիվանդը 16 տարեկան էր, նրան խայթել էր մակաբույծ ֆիլարիա որդերի փոխանցող մոծակը:
Հայտնվելով մարդու օրգանիզմի մեջ՝ որդերը ավշային ֆիլյարիոզ են առաջացնում՝ հիվանդություն, որը հանգեցնում է մաշկի եւ ենթամաշկային հյուսվածքների աճին:
2016 թվականից տղամարդը ազդրին գոյացած հսկայական ուռուցքի պատճառով գամված էր անկողնուն: Նա տեղից վեր էր կենում միայն զուգարան գնալու համար, բայց անգամ այդ դեպքում նրան օգնություն էր հարկավոր:
Հինգ ժամ տեւած վիրահատությունից հետո, որի համար հինգ վիաբույժ եւ երեք անեսթեզիոլոգ էր պահանջվել, հիվանդի քաշը կրճատվել է 25 կիլոգրամով: Այժմ նա 83 կգ է կշռում եւ երկար ժամանակվա ընթացքում առաջին անգամ կարող է տեղաշարժվել առանց կողմնակի օգնության: Բժիշկները կարծում են, որ եւս մեկ վիրահատությունից հետո, որը նախատեսվում է իրականացնել 6-9 ամիս անց, տղամարդը կկարողանա նորմալ կյանք վերադառնալ:
«Հիանալի զգացում է առանց որեւէ օգնության կանգնել սեփական ոտքերի վրա: Ես վաղուց արդեն հույսս կորցրել էի եւ անգամ մտածում էի, որ եթե վարակը տարածվի, ոտքերս կկտրեն: Ինձ կյանք վերադարձրեցին, եւ այժմ ես անհամբեր սպասում եմ, թե երբ կրկին աշխատանքի կգնամ»,- պատմել է տղամարդը:
