Ցանկացած մասնագիտության բժիշկ իր պատասխանատվությամբ կարող է ցանկացած դեղ դուրս գրել. փոխնախարար

Ցանկացած մասնագիտության բժիշկ իր պատասխանատվությամբ կարող է բժշկական ցուցումների հիման վրա ցանկացած դեղ դուրս գրել, դրա անհրաժեշտության հիմնավորման դեպքում։ Այս մասին մարտի 20-ին ֆեյսբուքյան մամուլի ասուլիսի ժամանակ հայտարարեց առողջապահության փոխնախարար Սերգեյ Խաչատրյանը՝ ի պատասխան NEWS.am Medicine-ի այն հարցին, թե արդյոք բժիշկների համար սահմանափակումներ կա՞ն ըստ մասնագիտացումների, եւ օրինակ՝ էնդոկրինոլոգը կարո՞ղ է սրտի համար դեղեր նշանակել:

Ինչ վերաբերում է պոլիկլինիկաների բժիշկների աշխատանքի ժամանակի մեծացմանը եւ նրանց աշխատավարձի բարձրացմանը, քանի որ դեղատոմսերով դեղերի բացթողման նոր կանոնը նրանց համար կդառնա լրացուցիչ ծանրաբեռնվածություն, Սերգեյ Խաչատրյանը չհամաձայնվեց, որ սա լրացուցիչ ծանրաբեռնվածություն է, իսկ աշխատավարձերի բարձրացման հարցն անպատասխան թողեց:

Նա հավելեց, որ դեղատոմս գրելը բժշկի աշխատանքի անբաժանելի մասն է: