«Սա ավանսով որոշում է». Թումանյանի ծոռանը շնորհեցին ԵՊԲՀ պատվավոր դոկտորի կոչում

Սանկտ Պետերբուրգի Պաստերի անվան համաճարակաբանության եւ միկրոկենսաբանության գիտահետազոտական ինստիտուտի տնօրեն, Սանկտ Պետերբուրգի Պավլովի անվան առաջին պետական բժշկական համալսարանի իմունաբանության ամբիոնի վարիչ Արեգ Թոթոլյանն արժանացել է Երեւանի Հերացու անվան պետական բժշկական համալսարանի պատվավոր դոկտորի կոչման: Համալսարանական պատմուճանը նրան է հանձնվել ապրիլի 16-ին ԵՊԲՀ-ում «Իմունոախտորոշման եւ իմունոթերապիայի արդի հիմնախնդիրները» գիտաժողովի բացման ժամանակ:

Դոկտորը պարգեւը ստանալիս հուզվեց եւ ամբիոնի մոտ կանգնած երկար ժամանակ փորձում էր զսպել զգացմունքները: «Այս որոշումը շատ պարտավորեցնող է, եւ այս որոշումն ավանսով է»,- նշեց նա՝ հավելելով, որ վերջին 10 տարիներին իր ելույթներից առաջ այլեւս չի հուզվում, բայց այս դահլիճում ինքը 5 տարում երկրորդ անգամ է ելույթ ունենում, եւ երկրորդ անգամ իրեն մեծ հուզում է համակում:

«Ես ակտիվ աշխատանքի դեռ 10-15 տարի ունեմ, եւ կկարողանամ այս ավանսը վաստակել»,- խոստացավ նա:

Տեղի ունեցող գիտաժողովը նվիրված է իմունաբանության, ալերգաբանության հարցերին, իմունոթերապիայի եւ աուտոիմունային հիվանդությունների բուժման նորագույն մեթոդներին: Գիտաժողովին մասնակցում են Ռուսաստանի Դաշնությունից 14 դասախոսներ:

Համալսարանի ռեկտոր Արմեն Մուրադյանը, գիտաժողովը բացելով, նշեց, որ իմունաբանությունը, ալերգաբանությունը, վիրուսաբանությունը, համաճարակաբանությունը ապագայի ուղղություններն են: «Անհատականացված բժշկությունը, բջջային բժշկությունը աշխարհի առողջապահական համակարգում արդեն կիրառական բաղկացուցիչ ունեն»,- ասաց նա:

Նշենք, որ Արեգ Թոթոլյանը հայ գրականության դասական Հովհաննես Թումանյանի ծոռն է: Նրա մայրը՝ Սուրմա Թումանյանը, գրողի կրտսեր որդի Արեգի դուստրն է: Արեգ Թոթոլյանի ծնողները նույնպես բժիշկներ են՝ Երեւանի բժշկական համալսարանի 1954 թվականի շրջանավարտներ: Արեգը Երեւանում է ծնվել եւ այստեղ ապրել է մինչեւ 6 տարեկանը, որից հետո ծնողները նրան Լենինգրադ են տարել: