Գոտկատեղի չափի ու վիտամին D-ի պակասի միջև կապ է հայտնաբերվել
22:03 21 մայիսի, 2018Որքան շատ են մարդու որովայնի մասում ճարպային կուտակումները, այդքան հավանական է, որ նա տառապում է վիտամին D-ի պակասից։ Նման եզրակացության են հանգել Նիդերլանդների Լեյդենյան համալսարանին առընթեր Բժշկական կենտրոնի հետազոտողները Էնդոկրինոլոգների եվրոպական համայնքի անդամների հանդիպման ժամանակ։
Հետազոտությանը մասնակցել են 45-65 տարեկան ավելի քան 4000 տղամարդ ու կին։ Որքան շատ ճարպային կուտակումներ են եղել մասնակից կանանց որովայնի մասում, այդքան ցածր է եղել վիտամին D-ի խտությունը նրանց արյան մեջ։ Սակայն տղամարդկանց շրջանում նման փոխադարձ կապ չի հայտնաբերվել։ Ընդ որում տղամարդկանց դեպքում արյան մեջ վիտամին D-ի պարունակության վրա նման ձևով ազդում էր լյարդի ճարպակալումը։ Նաև թե տղամարդկանց, թե կանանց շրջանում դիտարկվում էր հետադարձ կապ վիսցերալ (ներքին օրգանների շուրջը տեղակայված) ճարպի ու արյան մեջ վիտամին D-ի պարունակության միջև։
Հետազոտողները դեռ չեն կարողանում բացատրել, թե հատկապես ինչն է այդ փոխադարձ կապի հիմքում՝ արդյոք վիտամին D-ի պակասը ճարպակալման հակում ստեղծող գործոն է, թե՞ հակառակը ՝ ճարպի ավելցուկն է հանգեցնում վիտամին D-ի խտության նվազմանը։ Նրանք առայժմ ավելորդ քաշով մարդկանց խորհուրդ են տալիս հետևել իրենց օրգանիզմում վիտամին D-ի մակարդակին։