Գիտնականները հայտնաբերել են նստակյաց կյանքի նոր վտանգը

Ոտքերի մկանների վրա ֆիզիկական ծանրաբեռնվածությունը նվազեցնում է նեյրոդեգեներատիվ հիվանդությունների, այդ թվում ցրված սկլերոզի ու ողնուղեղի ատրոֆիայի առաջացման վտանգը, նաեւ խոչընդոտում է դրանց առաջընթացին, պարզել են Միլանյան համալսարանի գիտնականները։ Մասնագետների հոդվածը հրապարակվել է Frontiers in Neuroscience  ամսագրում։

28 օր տեւած փորձն իրականացրել են մկների վրա, որոնց պոչը կապել են վանդակին այնպես, որ կենդանիները կարողանային միայն առջեւի թաթերի վրա ազատ շարժվել։ Փորձի ընթացքում կրծողները նորմալ սնվում էին ու սթրեսի որեւէ նշան չէին դրսեւորում։ Դրանից հետո գիտնականները վերլուծել են ուղեղի սուբվենտրիկուլյար գոտին, որը նոր նեյրոններ է մատակարարում օրգանիզմին կյանքի ամբողջ ընթացքում։

Պարզվել է, որ հետեւի թաթերի անշարժացումը 70 տոկոսով նվազեցրել է նյարդային ցողունային բջիջների քանակը հսկիչ խմբի կենդանիների համեմատ։ Շատ նեյրոններ ու օլիգոդենդրոցիտներ, որոնք նյարդային հյուսվածքները մեկուսացնում են ու լավացնում իմպուլսների հաղորդումը, ամբողջովին չէին հասունանում։

Գիտնականները հանգել են այն եզրակացության, որ ոտքերի համար վարժությունները ապահովում է ազդանշանների գեներացիա, որոնք ապահովում են առողջ նյարդային բջիջների արտադրություն։ Ֆիզիկական ակտիվության բացակայությունը նվազեցնում է հյուսվածքների հագեցումը թթվածնով, ինչը անաէրոբային միջավայր է ստեղծում ու փոխում նեյրոնների մետաբոլիզմը։ Բացի դրանից, նվազում է որոշ գեների՝ այդ թվում CDK5Rap1-ի ակտիվությունը, որը պատասխանատու է  միտոխոնդրիաների նորմալ գործունեության համար։