Ախտահանող միջոցները բակտերիաներից այլեւս չե՞ն պաշտպանում
14:00 3 օգոստոսի, 2018Բակտերիաները կայունություն են մշակել սպիրտի նկատմամբ, որը ախտահանող միջոցների մեծ մասի հիմնական բաղադրիչն է: Բուժհաստատությունները բակտերիաների դեմ պայքարելու համար կարող են նոր միջոցների կարիք ունենալ, նշված է Science Translational Medicine-ում հրապարակված հոդվածում:
Իզոպրոպանոլ սպիրտը մտնում է ախտահանման միջոցների մեջ, որոնք գործածվում են ամենուրեք: Այն արդյունավետ է մեթիցիլինառեզիստենտ ստաֆիլոկոկի դեմ, սակայն վանկոմիցինառեզիստենտ էնթերոկոկերը կամ VRE-ն (սուպերբակտերիաներ) սպիրտի նկատմամբ պակաս ընկալունակ են դառնում:
«Սա բոլոր բուժհաստատությունների համար տագնապահարույց նշան է: VRE-ի դեմ պայքարի համար անհրաժեշտ են լրացուցիչ միջոցառումներ»,- նշել է Մելբուրնի համալսարանի պրոֆեսոր Տիմոտի Սթիները:
Հետազոտության ժամանակ գիտնականները լաբորատոր պայմաններում enterococcus faecium բակտերիան 5 րոպե մշակել են իզոպրոպանոլի հիմքով լուծույթով: Մասնագետների տրամադրության տակ էր Մելբուրնի հիվանդանոցներից ընդամենը 139 նմուշ, որ վերցվել էին 1997-ից 2015 թվականներն ընկած ժամանակահատվածում:
«Մենք հայտնաբերել ենք, որ 2010 թվականից հետո նմուշները 10 անգամ ավելի տոլերանտ են սպիրտի ազդեցության նկատմամբ, քան նախորդները»,- ընդգծել է Սթիները:
Էնթերոկոկերը հաճախ օրգանիզմ են ընկնում ներհիվանդանոցային պայմաններում, արդյունքում կարող է զարգանալ, այսպես կոչված, սուպերինֆեկցիա: Այն դառնում է ոչ միայն աղիքային խանգարումների պատճառ, այլ նաեւ մահացու վտանգավոր սեպսիսի: Առողջ մարդկանց իմունիտետը ճնշում է սուպերբակտերիաներին, սակայն այն հիվանդները, որոնց առողջությունը թուլացած է քիմիաթերապիայի կամ օրգանների փոխպատվաստման հետեւանքով, մեծ վտանգի են ենթարկվում:
Փորձագետները խորհուրդ են տալիս քլորով միջոցներ օգտագործել եւ առավել ուշադիր վերաբերվել ինֆեկցիանիերի հնարավոր փոխանցողների հայտնաբերմանը: