Փղերը գիտնականներին կօգնեն հասկանալ քաղցկեղային բջիջների «սպանության» մեխանիզմը

Փղերը գիտնականներին կօգնեն հասկանալ քաղցկեղային բջիջների «սպանության» մեխանիզմը: Չիկագոյի համալսարանի գիտնականները պարզել են, որ փղերի 6 (LIF6) կեղծ գենը (կամ «զոմբի գենը») կարող է թերություններ ունեցող բջիջները սպանել, հայտնում է Phys.org-ը: Ինչպես նշում են մասնագետները, դրանով կանխվում է չարորակ օնկոլոգիայի զարգացումը:

Գենոմի այս հատվածը կարող է ակտիվ վիճակի մեջ հայտնվել եւ սպիտակուց կոդավորել, որը ոչնչացնում է միտոքոնդրիումները: Գիտնականները ուշադրություն են դարձրել այն փաստին, որ փղերի շրջանում քաղցկեղով հիվանդացությունը 5 տոկոսից քիչ է, մինչդեռ մարդկանց շրջանում այս ցուցանիշը հասնում է մինչեւ 17 տոկոսի:

Ինքը կեղծ գենն է մասնակցում մուտացիայի ենթարկված գեներում միտոքոնդրիումների թաղանթների քայքայմանը, ինչն արդյունքում բերում է դրանց մահվանը:

Փղերի մոտ LIF գեների թիվը հասնում է 8-ի, սակայն այսօրվա դրությամբ հայտնի է միայն LIF6-ի գործառնության մասին: Գիտնականները նշում են, որ «զոմբի գենը» սկսել է գործել մոտ 25-30 մլն տարի առաջ, ընդ որում՝ քաղցկեղի ճնշման այս «տարրը», հնարավոր է, դերակատարում է ունեցել կաթնասունների տվյալ տեսակի մարմնի չափերի մեծացման մեջ: