Նոր հավելվածը կօգնի Երեւանի դեղատներում հեշտությամբ գտնել անհրաժեշտ դեղը

Հայ երիտասարդները նոր հավելված են մշակել, որը կօգնի Երեւանի դեղատներում գտնել անհրաժեշտ դեղը, պարզել նրա գինը եւ անհրաժեշտության դեպքում այն «պահեստավորել» առաջիկայում գնելու համար:

FastMed հավելվածի հեղինակ Գրիգոր Կորկոտյանը NEWS.am Medicine-ի հետ զրույցում հայտնեց, որ անձամբ ինքը բազմիցս բախվել է դեղերի որոնման խնդրին. երբեմն բազմաթիվ դեղատներ է այցելել մեկ դեղ գտնելու համար:

«Ես մտածեցի՝ ինչո՞ւ մեկ ընդհանուր հարթակ չկա, որտեղ կարելի է պարզել, թե որ դեղատանը կա անհրաժեշտ դեղը»,- ասաց նա:

Այսպես էլ ծնվել է հավելվածի մշակման գաղափարը, որը կարող է թեթեւացնել բոլոր երեւանցիների կյանքը: Առայժմ հավելվածը ներառում է Երեւանի միայն 12 դեղատներ, սակայն մշակողները հույս ունեն ապագայում գրանցել քաղաքի բոլոր կամ գրեթե բոլոր դեղատները, իսկ հնարավոր է՝ նաեւ երկրի: Ապագայի այլ ծրագրեր էլ կան, օրինակ՝ հավելվածին ավելացնել դեղը տուն բերելու պատվերի հնարավորությունը:

Ինչպես պատմեց Գրիգոր Կորկոտյանը, հավելվածի այլ հետաքրքիր գործողությունները ներառում են դեղագործի հետ անվճար խորհրդատվություն, ինչպես նաեւ անընթեռնելի դեղատոմսի լուսանկարը դեղագործին ուղարկելու եւ «վերծանված» տեքստային տարբերակը ստանալու հնարավորություն:

Հավելվածն արդեն հասանելի է Google Play-ում, իսկ շուտով տարբերակ կթողարկվի նաեւ App Store-ի համար: Հիմա տարվում են նաեւ կայքի ստեղծման աշխատանքներ:

«Մեր հավելվածի գլխավոր խնդիրն է մարդկանց համար հեշտացնել դեղերի որոնումը, հատկապես տարեցների, երիտասարդ ծնողների համար, որոնք դժվարանում են ժամերով դեղատներ այցելել դեղերի որոնմամբ»,- նշեց Գրիգոր Կորկոտյանը: