Հայաստանում պատվաստման ցածր մակարդակը վախով է պայմանավորված. մասնագետ
15:39 17 հոկտեմբերի, 2018Մարդու պապիլոմայի վիրուսի դեմ պատվաստման ցածր մակարդակը պայմանավորված է քաղաքացիների վախով եւ ապատեղեկատվությամբ: Այս մասին ՄՊՎ-ի, կարմրախտի եւ այլ հիվանդությունների դեմ պատվաստման խնդրին նվիրված միջազգային գիտաժողովի շրջանակում լրագրողների հետ հանդիպման ժամանակ ասաց Հայաստանի ԱՆ իմունոկանխարգելման ազգային ծրագրի ղեկավար Գայանե Սահակյանը:
Նա նշեց, որ պատվաստման ծրագիրը Հայաստանում ներդրվել է անցյալ տարվա սեպտեմբերին, սակայն մինչեւ հիմա պատվաստվել է միայն աղջիկների 5 տոկոսը:
«Նման ցածր մակարդակը պայմանավորված է բնակչության անվստահությամբ եւ անգամ վախով»,- հայտարարեց նա:
Գայանե Սահակյանը շեշտեց, որ սրա հետ կապված ստիպված են երկու ուղղությամբ աշխատանքներ տանել՝ պայքարել ՄՊՎ պատվաստման վնասի մասին ապատեղեկատվության դեմ եւ կազմակերպել բուն պատվաստման աշխատանքը: Սահակյանի խոսքով՝ իրազեկման աշխատանք է տարվում ե՛ւ քաղաքցաիների շրջանում, ե՛ւ բուժաշխատողների, քանի որ վերջին շրջանում նույնիսկ որոշ բժիշկների մետ է անվստահություն նկատվում պատվաստման հանդեպ:
Մասնագետը նշեց, որ իրազեկման աշխատանքն ավելի մեծ ջանքեր եւ միջոցներ է պահանջում, քանի ինքը պատվաստումը:
«Պատվաստման անվտանգության մասին բնակչության իրազեկման գործում զգալի դեր ունեն լրատվամիջոցները եւ սոցցանցերը: Դրանց միջոցով կարելի է անցկացնել լուսաբանման լայն գործունեություն»,- հայտարարեց Առողջապահության համաշխարհային կազմակերպության փորձագետ Բրենդա Կորկորանը (Իռլանդիա):
Մամուլի ասուլիսի մասնակիցներն ընդգծեցին նաեւ առողջապահության նախարարության համար ֆինանսական օգուտը, քանի որ պատվաստումը վերջնարդյունքում ավելի պակաս ծախսատար է, քան մարդու պապիլոմայի վիրուսի ինֆեկցիայի բուժումը:
Նշենք, որ Հայաստանում հոկտեմբերի 17-19-ը ընթանում է ՄՊՎ-ի, կարմրախտի եւ այլ հիվանդությունների դեմ պատվաստման խնդրին նվիրված միջազգային գիտաժողովը: