Պայքարը շարունակվում է. Հայ ստոմատոլոգները ցանկանում են շրջանառությանը համապատասխան հարկեր վճարել
17:22 9 նոյեմբերի, 2018Ստոմատոլոգիական կլինիկաների վճարած հարկերն անհամաչափ են ստացած եկամուտներին, բարձր հարկերը եւ դրանց բազմազանությունը զգալիորեն դժվարեցնում են ստոմատոլոգների կյանքը եւ բարձրացնում նրանց ծառայությունների արժեքը, պնդում է «Կառուցողական ստոմատոլոգիա» ՀԿ նախագահ Հովհաննես Գեւորգյանը:
Հայ ստոմատոլոգների խոսքով՝ ահա արդեն քանի տարի է իրենք ստիպված են ե՛ւ յուրաքանչյուր բազկաթոռի համար հարկ վճարել (80 հազար դրամ), ե՛ւ եկամտահարկ: Ավելին՝ էլեկտրոնային առողջապահության ներդրումը նրանց կյանքն է՛լ ավելի է դժվարեցնում եւ լրացուցիչ ծախսեր ու խնդիրներ առաջացնում:
Ստոմատոլոգները ցանկանում են, որ վճարվելիք հարկատեսակները եւ հարկաչափերը լինեն ավելի խելամիտ: Կատարյալ կլիներ, եթե հարկերը շրջանառությանը համապատասխան լինեին, նշեց Հովհաննես Գեւորգյանը:
Արդեն մի քանի ամիս հայ ստոմատոլոգները խոսում են հարկերի խնդրի մասին: Վերջին ակցիաներից եւ ցույցերից հետո նրանց խոստացել են, որ նոր Հարկային օրենսգրքում, որը հիմա մշակվում է, կփոփոխվեն նաեւ ստոմատոլոգիական կլինիկաների եւ կաբինետների հարկման մոտեցումները: Առայժմ առավել ակտիվ ստոմատոգոլոգները պատրաստվում են Առողջապահության նախարարություն ներկայացնել փոփոխությունների փաթեթ, որոնք կցանկանային տեսնել նոր Հարկային օրենսգրքում: