Ինչո՞ւ է դժվար ստել՝ աչքերին նայելով
20:03 15 նոյեմբերի, 2018Պարզվում է, որ իսկապես դժվար է ստել զրուցակցի աչքերին նայելով: Տեմպերի համալսարանի (Ֆինլանդիա) հոգեբանները հետազոտել են զրուցակցի աչքերին ուղիղ նայելու եւ անկեղծության միջեւ փոխկապվածությունը ու եկել են այն եզրակացության, որ «աչքը աչքին» շփումն անկեղծությունը մեծացնում է:
Ինտերակտիվ փորձի շրջանակում մասնակիցները համակարգչային խաղ են խաղացել մեկը մեկին ձեւաչափով: Միաժամանակ, խաղի կանոնների համաձայն՝ հաղթանակի հասնելու համար անհրաժեշտ էր մրցակցին խաբել:
Խաղի յուրաքանչյուր փուլը սկսելուց առաջ մասնակիցներին թափանցիկ պատուհանի մեջ արագ ցույց են տվել նրանց մրցակցի դեմքը, որից հետո նրանք պետք է իրենց քայլն անեին կա՛մ խաբելու, կա՛մ ազնիվ ճանապարհով:
Ինքը՝ մրցակիցը կա՛մ պետք է նայեր խաղացողի աչքերի մեջ, կա՛մ հայացքը տեղափոխեր մոնիտորի էկրանին: Որքան էլ տարօրինակ է, խաղացողի ուղիղ հայացքի ներքո խաղի մասնակիցներն ավելի հազվադեպ են որոշել խաբել:
Գիտնականները վստահ են, որ «աչքը աչքին» շփումը կարող է օգնել ոչ միայն առօրյա կյանքում, այլեւ բանակցություններ կամ հարցաքննություններ վարելիս: