Ինչպիսի՞ հիվանդություններ կարող են առաջացնել կրծքի սիլիկոնային իմպլանտները

Կրծքի սիլիկոնային իմպլանտներն ամենեւին էլ այնքան անվտանգ չեն, որքան ցանկանում են հավատալ շատ կանայք ու տղամարդիկ. ինչպես պնդում են University of Texas MD Anderson Cancer Center-ի գիտնականները, սիլիկոնային իմպլանտները 600 տոկոսով մեծացնում են արթրիտի զարգացման հավանականությունը, 400 տոկոսով՝ մաշկի քաղցկեղի եւ 450 տոկոսով՝ մեռելածնության:

Այս ոլորտում անցկացված խոշորագույն հետազոտություններից մեկի համաձայն, որը հրապարակվել է Annals of Surgery ամսագրում, աղային իմպլանտների համեմատությամբ, սիլիկոնայինները վիրահատությունից հետո 2 անգամ ավելի հաճախ են բարդություններ առաջացնում, այդ թվում՝ իմպլանտի շուրջ սպիացում: Սիլիկոնային իմպլանտ տեղադրելուց հետո երեխայի մահացած ծնվելու հավանականությունը մեծ է 4,5 անգամ, իսկ մելանոմայի զարգացման հավանականությունը՝ 4 անգամ:

Սիլիկոնային իմպլանտները պատրաստված են սիլիկոնից, իսկ աղայինները լցված են ստերիլ աղային լուծույթով: Կանանցից շատերի խոսքով՝ կրծքի սիլիկոնային իմպլանտներն ավելի բնական տեսք ունեն, քան աղայինները: Սակայն արտահոսքի դեպքում էլ սիլիկոնայինն ավելի վտանգավոր է, քան աղային լուծույթի դեպքում է:

Նախկինում գիտնականները շատ էին խոսում իմպլանտների եւ կրծքագեղձի քաղցկեղի փոխկապվածության մասին, բայց այդպես էլ չհաջողվեց այդ կապն ապացուցել: Հիմա, սակայն, գիտնականները հստակ դիտվող կապ են հայտնաբերել իմպլանտների եւ արթրիտի, մաշկի քաղցկեղի ու մեռելածնության միջեւ:

Նրանք վերլուծել են 100 հազար կանանց տվյալները, որոնցից 80 հազարը սիլիկոնային իմպլանտ է ունեցել, իսկ մնացյալը՝ աղային: Առաջին խմբի կանայք խնդիրների եւ բարդությունների ավելի հաճախ են բախվել, քան երկրորդ խմբի կանայք: Մասնավորապես՝ բնական կրծքով կանանց համեմատությամբ նրանց շրջանում ռեւմատոիդ արթրիտի, Շեգրենի համախտանիշի եւ սկլերոդերմիայի զարգացման հավանականությունը միանգամից 6 անգամ բարձր է եղել:

Հետազոտողների խոսքով՝ կանայք պետք է տեղյակ լինեն այն բոլոր հնարավոր բարդություններին եւ խնդիրներին, որոնք նրանց կարող են սպասել, եւ միայն դրանից հետո կարող են ընդունել պլաստիկ վիրահատություն կատարելու տեղեկացված որոշում: