Իսրայելցի արաբներն ու հայկական «կեղծ» դիպլոմները. Մութ պատմության մեջ սպիտակ բծեր կան

Հայկական կողմն իսրայելական կողմից ոչ մի պաշտոնական հարցում կամ ուղերձ չի ստացել հայկական կեղծ դիպլոմներով Իսրայելում աշխատող ձերբակալված բժիշկների մասին: Այս մասին NEWS.am Medicine-ի թղթակցի հետ զրույցում ասաց ԿԳՆ Արտաքին կապերի եւ սփյուռքի վարչության պետ Արկադի Պապոյանը:

Պապոյանի խոսքով՝ ԿԳՆ աշխատակիցները կեղծ դիպլոմների շուրջ սկանդալի մասին տեղեկացել են լրատվամիջոցների հրապարակումներից: Այս հրապարակումներն ուսումնասիրելով՝ նրանք նախատեսում են ԱԳՆ միջոցով դիմել Իսրայելից գործընկերներին՝ հասկանալու համար, թե կոնկրետ ինչ է տեղի ունենում, Իսրայելում ձերբակալված բժիշկները ինչ դիպլոմներ են ներկայացրել:

Իսրայելական լրատվամիջոցների հրապարակումների համաձայն՝ դեկտեմբերի 2-ին Իսրայելի ոստիկանությունը ձերբակալել է 40 բժիշկների, ստաժորների եւ դեղագործների՝ հայկական բուհերում ուսումն ավարտելու դիպլոմներով: Քննության տեղեկություններով՝ կասկածյալները, այսպես կոչված, իսրայելցի արաբները իսրայելական բուժհաստատություններում աշխատելու հնարավորություն են ստացել՝ երկրի առողջապահության նախարարությանը ներկայացնելով կեղծ դիպլոմներ, որոնք խարդախ ճանապարհով ստացել են արտասահմանում, այդ թվում՝ Հայաստանում: Նրանց այդ գործում օգնել է միջնորդը («մահեր»), որը նրանց ծանոթացրել է բժշկական բուհերի ներկայացուցիչների հետ, որոնք պարագեւավճարի դիմաց դիպլոմներ են հանձնել: Հայակական բուհերի շարքում նշվել են «Հայբուսակ» համալսարանը, Սուրբ Թերեզայի համալսարանը եւ Ավանդական բժշկության համալսարանը:

Հետաքրքիր է, որ Հայաստանից կեղծ դիպլոմների շուրջ շատ նման մի սկանդալ էլ ծագել էր անցյալ տարի: Հաղորդվում էր, որ հայկական բուհերի մի շարք արտասահմանցի շրջանավարտներ իրենց դիպլոմները ստացել են՝ դրանց համար վճարելով մոտ 10 հազար եվրո, որից հետո աշխատանքի էին ընդունվել իսրայելական բժշկական հաստատություններում:

Ինչպես նշեց Արկադի Պապոյանը, գործընկերների հետ միասին իրենք դեռեւս չեն հասկանում՝ հիմա խոսքն անցյա՞լ տարվա դեպքի մասին է, թե՞ սրանք արդեն հայկական դիպլոմներով ուրիշ շրջանավարտներ են: Նա հույս ունի, որ ամեն ինչ կհստակվի իսրայելական կողմից պաշտոնական տեղեկություններ ստանալուց հետո:

Արկադի Պապոյանը հիշեցրեց, որ անցյալ տարվա սկանդալից հետո Իսրայելի առողջապահության ոլորտի ներկայացուցիչները Հայաստան են այցելել, մի շարք հանդիպումներ ունեցել ե՛ւ առողջապահության նախարարության, ե՛ւ կրթության նախարարության ներկայացուցիչների հետ:

«Այս հանդիպումների արդյունքներով նրանք խոստացել են կեղծ դիպլոմների մասին գործի հետ կապված իրենց եզրակացությունները ներկայացնել, բայց մինչ օրս նրանցից ոչ մի տեղեկություն չենք ստացել»,- նշեց Պապոյանը:

Հոդվածում հիշատակված հայկական բուհերի ներկայացուցիչները պնդում են, որ նրանք ոչ մի դիպլոմ չեն վաճառել:

Սուրբ Թերեզայի անվան համալսարանի ռեկտոր Լարիսա Համբարձումյանը NEWS.am Medicine-ի հետ զրույցում նշեց, որ իրենց բուհում Իսրայելից 5 կամ 6 ուսանող է սովորել, սակայն խնդիրն առաջացել է միայն մեկի հետ՝ Ալկրինավի Մոհամմեդ անունով մի երիտասարդի:

«Ռուսական բուհից հետո նա սովորել է մեր համալսարանում, դիպլոմ ստացել: Բանն այն է, որ մեր բուհի դիպլոմը պետական նմուշի չէր, դրա համար նա Իսրայելում չէր կարողացել մասնագիտությամբ աշխատանքի ընդունվել:

Տվյալ անձի հետ կապված, ավելի վաղ իսրայելական կողմից մենք պաշտոնական հարցում էինք ստացել, որին գրավոր պատասխանել էինք:

Սա հին պատմություն է, որի մասին պարբերաբար բարձրաձայնում են: Ինչ վերաբերում է դիպլոմների վաճառքի մասին խոսակցություններին, ապա իրավապահները կարող են ստուգումներ իրականացնել մեր բուհում», - ասաց ռեկտորը:

Իսկ Ավանդական բժշկության համալսարանում 27 տարվա աշխատանքի ընթացքում Իսրայելից ոչ մի ուսանող չի եղել, դրա համար հասկանալի չէ, ինչպես է այս համալսարանը հայտնվել դիպլոմներ վաճառողների ցանկում:

Ռեկտոր Նորիկ Սարիբեկյանը NEWS.am Medicine-ի հետ զրույցում նշեց, որ համալսարանն արտասահմանցի ուսանողներր հետ աշխատում է անցյալ տարվանից, եւ այժմ իրենց մոտ եվրոպական երկրներից 24 ուսանող է սովորում:

«Մենք նախկինում էլ, հիմա էլ Իսրայելից ուսանողներ չենք ունեցել»,- ընդգծեց ռեկտորը:

Նրա խոսքով՝ Ավանդական բժշկության համալսարանը պատահական է հայտնվել ցուցակում կամ չարամտորեն:

«Բացառված չէ, որ այս ամենի հետեւում կարող է ինչ-որ պատվիրատու լինել, որը ցանկանում է մեզ որակազրկել»,- ասաց ռեկտորը:

NEWS.am Medicine-ին դեռ չի հաջողվել կապ հաստատել «Հայբուսակ» համալսարանի ղեկավարության հետ: