Երեխաների ծնունդը 14 տոկոսով մեծացնում է սրտի հիվանդությունների եւ կաթվածի զարգացման վտանգը
16:19 21 դեկտեմբերի, 2018Ծննդաբերած կանանց մոտ սրտի հիվանդությունների եւ կաթվածի զարգացման վտանգը 14 տոկոսով ավելի բարձր է, քան երեխա չունեցած կանանց մոտ: Այս մասին ասվում է նոր հետազոտությունում, որի արդյունքները հրապարակվել են European Journal of Preventive Cardiology ամսագրում:
Հետազոտության հեղինակների խոսքով՝ հղիության ժամանակ որովայնի շրջանում կարող է ճարպ կուտակվել, անոթների ներքին թաղանթի գործառույթները կարող են խախտվել, ինչը աթերոսկլերոզի, արյան մեջ լիպիդների մակարդակում ատերոգենային փոփոխությունների եւ համակարգային բորբոքման կարող է հանգեցնել: Այս բոլոր գործոնները կարող են առհավետ ավելացնել սրտանոթային հիվանդությունների զարգացման վտանգը:
Նման եզրակացության հանգելու համար գիտնականները հավաքել են ողջ աշխարհից տվյալներ եւ վերլուծել դրանք: Նրանք ընտրել են 10 հետազոտություններ, որոնց մասնակցել է 3 098 929 կին եւ որոնցից 150 512-ի մոտ այդ ընթացքում սրտի հիվանդություններ եւ կաթված է զարգացել:
Վերլուծությունը ծննդաբերության եւ սրտանոթային հիվանդությունների միջեւ նշանակալի կապ է հայտնաբերել. ծննդաբերած կանանց մոտ այն 14 տոկոսով բարձր էր, քան երեխա չունեցած կանանց, ավելին՝ յուրաքանչյուր հաջորդող ծնունդը 4 տոկսով մեծացնում էր այդ վտանգը:
Huazhong University of Science and Technology-ից բժիշկ Դոնգմինգ Ուոնգը նշել է, որ բժիշկները պետք է կանանց զգուշացնեն այն մասին, որ ծննդաբերությունը կարող է մեծացնել է սրտի հիվանդությունների եւ կաթվածի զարգացման վտանգը, ուստի այդ խնդիրների կանխարգելումը պետք է նախապես սկսել:
Դրա համար առաջարկվում է հրաժարվել վնասակար սովորություններից, սկսել կանոնավոր մարզվել, առողջ սնունդի անցնել եւ սկսել կարգավորել մարմնի քաշը: Ծննդաբերությունից հետո պետք է առողջ կենսակերպ վարել, փորձել քչացնել որովայնի շրջանի ճարպը եւ հետեւել դիետայի՝ արյան լիպիդների աստիճանը վերահսկելու համար: