Հայաստանում սեզոնային գրիպի դեմ արդեն պատվաստվել է 27 184 մարդ
18:36 24 դեկտեմբերի, 2018Դեկտեմբերի 22-ի տվյալներով՝ Հայաստանում սեզոնային գրիպի դեմ արդեն պատվաստվել է 27 184 մարդ: Այս մասին NEWS.am Medicine-ին հայտնեց ԱՆ իմունոկանխարգելման ազգային ծրագրի ղեկավար Գայանե Սահակյանը:
Նա հիշեցրեց, որ երկրի պոլիկլինիկաների միջեւ արդեն բաշխել են գրիպի դեմ պատվաստանյութի 54 430 դեղաչափ: Այս պատվաստանյութերի գրեթե կեսն արդեն օգտագործվել է:
Խորհուրդ է տրվում առաջին հերթին պատվաստվել, այսպես կոչված, մեծ ռիսկի խմբի մեջ մտած մարդկանց. նրանք են՝ բուժաշխատողները (նրանք մեծ թվով հիվանդների հետ են աշխատում եւ ենթակա են վարակվելու վտանգին), հղիները, 6 ամսականից մինչեւ 5 տարեկան երեխաները, ինչպես նաեւ քրոնիկական հիվանդություններով եւ 65-ն անց մարդիկ: Գայանե Սահակյանը նշեց, որ այս բոլոր մարդիկ գրիպի հանդեպ հատկապես խոցելի են. վարակվելու դեպքում նրանց մոտ մեծ է անբարենպաստ ելքով ծանր բարդությունների զարգացման հավանականությունը, այս պատճառով աշխատում են նրանց առաջին հերթին պատվաստել:
Պատվաստում են նաեւ զինծառայողներին, փակ հաստատություններում գտնվող մարդկանց (այդ թվում՝ ծերանոցներում եւ այլն), որտեղ օդակաթիլային ճանապարհով փոխանցվող ինֆեկցիոն հիվանդությունների տարածման հավանականությունը նույնպես շատ մեծ է:
Եթե դուք մտնում եք թվարկված ռիսկի խմբերից որեւէ մեկի մեջ, խորհուրդ է տրվում դրա պատճառով բարդություններից խուսափելու համար պատվաստվել:
Նշենք, որ գրիպի դեմ պատվաստումը հակացուցված է մինչեւ 6 ամսական երեխաներին եւ պատվաստանյութի որեւիցե բաղադրիչի նկատմամբ ալերգիայով մարդկանց: