Եղունգների եւ ձեռքերի մաշկի խնամքն առանձնապես արդիական է ձմռանը, օդի ցածր ջերմաստիճանի ժամանակ: Տնային պայմաններում ինչպիսի՞ միջոցներ կարելի է օգտագործել՝ հարցի շուրջ է NEWS.am Medicine-ի զրույցը մատնահարդարման վարպետ Գրետա Մայիլյանի հետ:
«Եթե պարաֆինաթերապիայի համար գեղեցկության սրահ այցելելու հնարավորություն չկա, ապա արժի շաբաթական 1-2 անգամ տնային պայմաններում հատուկ սկարբներ օգտագործել: Այնուհետեւ կարելի է մերսում կատարել եւ քսել յուղային հիմքով սնուցող քսուք: Այս գործողությունները ցանկալի է կատարել քնելուց առաջ, ինչը կբարձրացնի դրանց արդյունավետությունը»,- նշեց փորձագետը:
Յուղային հիմքով քսուքը պարտադիր ամեն օր քսեք ձեռքի մաշկին, հատկապես չոր մաշկի դեպքում:
Եղունգներն ամրացնելու համար Մայիլյանը խորհուրդ է տալիս մեկ շաբաթ ամեն երեկո քնելուց առաջ ձեռքերը սուզել տաք աղաջրի մեջ (200 գրամ ջրին 2 ճաշի գդալ աղ): Կարելի է օգտագործել ինչպես կերակրի, այնպես էլ ծովի աղ: Անհրաժեշտ է 20 րոպե հետո ձեռքերն աղաջրից լվանալ եւ պարտադիր կարգով ձեռքի դաստակներին յուղոտ քսուք քսել:
«Աղի լոգանքները հոյակապ արդյունք են ունենում, եղունգներն ամրացնում են, հատկապես եթե դրանք շետատվում են: Աղի լոգանքների մեկ շաբաթվա բուժական արդյունքը կարող է պահպանվել մի քանի ամիս»,- նշեց Մայիլյանը: