Մահացած 6 ամսական փոքրիկի հարազատները ԱՆ-ից պահանջում են ուշադրության կենտրոնում պահել մանկական մահացության դեպքերը
20:15 16 հունվարի, 2019Մահացած 6 ամսական փոքրիկի հարազատները ԱՆ-ից պահանջում են ուշադրության կենտրոնում պահել մանկական մահացության դեպքերը:
NEWS.am Medicine-ի հետ զրույցում փոքրիկի ազգական Ռոբերտ Գեւորգյանը նշեց, որ տվյալ խնդիրը պետք է համապատասխան մարմինների անմիջական հսկողության ներքո լինի:
«Ես որպես Հայաստանի քաղաքացի մտահոգված եմ կատարվածով», - շեշտեց նա:
6-ամսական Կամո Մարտիրոսյանը բարձր ջերմությամբ հոսպիտալացվել էր Աշտարակի հիվանդանոց, իսկ այնտեղից տեղափոխվել «Սուրբ Աստվածածին» ԲԿ: Երեխայի վիճակը չափազանց ծանր էր, առկա էր բոլոր վերջույթների կաթված, մկանային տոնուսը և ռեֆլեքսները վերջույթներում բացակայում էին: Երեխային միացրել էին արհեստական շնչառության սարքին:
Բժիշկները հարազատներին խորհուրդ էին տվել ռուսական արտադրության «Իմունովենին» դեղ ձեռք բերել, որը Հայաստանում չի վաճառվում:
«Մենք ստիպված էինք ծանոթների միջոցով այդ դեղը փնտրել Ռուսաստանում: Անգամ Մոսկվայի դեղատներում մեծ դժվարությամբ հաջողվեց այն գտնել:
Տարօրինակ իրավիճակ է. եթե մարդիկ Ռուսաստանում ծանոթներ չունենան, ապա նրանք չե՞ն կարողանա գնել անհրաժեշտ դեղը եւ փրկել իրենց երեխաների կյանքը», - նկատեց Գեւորգյանը:
Փոքրիկ Կամոյի դեպքում «Իմունովենինը» շատ ուշ էր հասել Հայաստան, փոքրիկը մահացել էր էնցեֆալոմիելիտից:
Գեւորգյանը դժվարացավ պատասխանել հարցին, թե մտադիր են արդյոք ծնողները դիմել իրավապահ մարմիններին՝ նշելով, որ հիմա նրանք ունայնացած եւ չափազանց ճնշված վիճակում են:
«Ինձ անհանգստացնում է ԱՆ կողմից տրամադրվող տեղեկատվության պակասը: Մարդիկ երկրում տիրող իրավիճակի մասին իրարից են իմանում, այլ ոչ թե պաշտոնական աղբյուրներից եւ արդյունքում ծոնղները վախենում են երեխայի ջերմության անգամ աննշան բարձրացումից: Ես կցանկանայի, որ ԱՆ-ն դրան ավելի մեծ ուշադրություն դարձներ», - ընդգծեց նա: