Կարմրուկի դեմ պատվաստանյութը աուտիզմ չի առաջացնում. գիտնականներ

Դանիացի գիտնականները ծավալուն հետազոտություն են անցկացրել, որն ապացուցել է, որ կարմրուկի, համաճարակային պարոտիտի եւ կամրախտի դեմ համակցված պատվաստանյութը (MMR) երեխաների մոտ աուտիզմ չի առաջացնում:

Հետազոտության շրջանակում վերլուծվել են 1999-ից 2010 թվականներին Դանիայում ծնված ավելի քան 657 հազար երեխաների բժշկական տվյալները: Նրանց 95 տոկոսից ավելին MMR պատվաստում են ստացել: Դրանից բացի, հետազոտության մեջ ընդգրկված 6517 երեխաների մոտ ախտորոշվել են աուտիկ սպեկտրի խանգարումներ:

Կոպենհագենի Statens Serum հետազոտական ինստիտուտի մասնագետները ուշադրություն են դարձրել աուտիկ սպեկտրի խանգարումների ռիսկի այնպիսի գործոններին, ինչպես վաղաժամ ծննդաբերությունը, հղիության ժամանակ մոր ծխելը եւ այլն:

Հետազոտությունը ցույց է տվել, որ MMR-ն չի մեծացնում աուտիզմի զարգացման հավանականությունը, ընդ որում՝ խոսքն ինչպես առողջ, այնպես էլ աուտիկ սպեկտրի խանգարումների նախահակվածություն ունեցող երեխաների մասին է: Միաժամանակ, 1999-ից 2001 թվականներին ծնված եւ MMR պատվաստում ստացած աղջիկների շրջանում աուտիզմի հավանականությունը նույնիսկ նվազած էր:

Հետազոտության արդյունքների վերաբերյալ գիտական հոդվածը հրապարակվել է Annals of Internal Medicine ամսագրում:

Նշենք, որ 1998 թվականին բրիտանացի բժիշկ Էնդրյու Ուեյքֆիլդը The Lancet բժշկական ամսագրում հետազոտություն էր հրապարակել, որում պնդում էր, որ MMR-ն երեխաների մոտ աուտիզմի զարգացման հավանականությունը մեծացնում է: Սակայն դրան հաջորդած քննություններով պարզվել էր, որ նա իր հետազոտության հիմքը դարձած տեղեկությունները խեղաթյուրել էր: 2010 թվականին Ուեյքֆիլդը զրկվել էր բժշկական լիցենզիայից, իսկ 2011 թվականին The Lancet-ը այդ հոդվածի հրապարակումը հետ էր կանչել: