Նարնջի հյութը նվազեցնում է ինսուլտի զարգացման վտանգը 24 տոկոսով
16:43 24 մարտի, 2019Նարնջի հյութը նվազեցնում է ինսուլտի առաջացման վտանգը 24 տոկոսով: Այդ մասին ասվում է British Journal of Nutrition-ում հրապարակված նոր հետազոտության մեջ:
20-70 տարեկան կամավորների շրջանում տասը տարի տեւած հետազոտության արդյունքում գիտնականները պարզել են, որ նարնջի հյութն ու մի շարք այլ թարմ քամած հյութեր մեկ քառորդով նվազեցնում են ինսուլտի զարգացման վտանգը: Անհրաժեշտ արդյունքի հասնելու համար պետք է ըմպել շաբաթական 4-8 բաժակ նարնջի հյութ:
Թարմ քամած հյութերի օգտակարության մասին շատերը լսել են, սակայն վերջին շրջանում մարդիկ հաճախ հրաժարվում են այդ հյութերից շաքարի չափազանց մեծ պարունակության պատճառով: Սակայն, ըստ նոր հետազոտության տվյալների, հնարավոր է, այդպիսի հյութերի օգտակարությունն ավելին է, քան վնասը դրանցում պարունակվող շաքարից:
Հետազոտության ընթացքում գիտնականները համադրել են վերջին 10 տարիներին այդ հյութն օգտագործելու մակարդակը ինսուլտով հիվանդ մարդկանց թվի հետ: Իհարկե, հաշվի են առնվել նաեւ այլ գործոնները՝ կապված ինսուլտի առաջացման վտանգի հետ:
Համաձայն հետազոտության, եթե մարդն օգտագործում էր այդ հյութն ամեն օր, ինսուլտի հավանականությունը նվազում էր 20 տոկոսով: Նարնջի հյութն օգնում էր կրճատել սրտի հիվանդությունները. դրա սիրահարները բախվում էին այդ խնդրի հետ 12-13 տոկոսով ավելի հազվադեպ: