Դիաբետի դեմ դեղերը կարող են պաշտպանել Ալցհեյմերի հիվանդությունից. հետազոտություն
09:34 27 մարտի, 2019Դիաբետի դեմ դեղերը կարող են պաշտպանել Ալցհեյմերի հիվանդությունից: Գիտնականները սա կապում են այն հանգամանքի հետ, որ որոշ դեղամիջոցներ, որոնք կարգավորում են արյան մեջ շաքարի մակարդակը, դրական են ազդում գլխուղեղի նեյրոնների վրա: Հետազոտությունը հրապարակվել է Diabetes Care բժշկական ամսագրում:
Գիտնականների խումբը վերլուծել է 1289 մարդու տվյալները, համեմատելով նրանց ողնուղեղի հեղուկի անալիզները, որոնք բուժվում են 2-րդ տիպի դիաբետից, եւ նրանց, որոնք չնայած այս ախտորոշման առկայությանը, համապատասխան դեղամիջոցներ չեն ընդունել:
Պարզվել է, որ դեղորայքային բուժում ստացող պացիենտների մոտ գլխուղեղի բջիջների վիճակը ավելի գոհացուցիչ էր, քան նրանց մոտ, որոնք դեղեր չեն ընդունել: Հետազոտության հիմքում սպիտակուցներն էին, որոնց անոմալ կուտակումը հանդիպում է Ալցհեյմերի հիվանդության դեպքում:
Գիտնականների կարծիքով՝ ստացած արդյունքները կարող են վկայել կա՛մ այն մասին, որ դեղորայքով չբուժվող դիաբետը հրահրում է Ալցհեյմերի հիվանդության ընթացք, կա՛մ այն մասին, որ դիաբետի դեմ դեղերն օգնում են դեմենցիայի կանխմանը:
Ամեն դեպքում, հետազոտությունը ցույց է տալիս դիաբետի, ինչպես նաեւ այլ մետաբոլիկ հիվանդությունների ժամանակին հայտնաբերման եւ բուժման կարեւորությունը: