Հազվադեպ հիվանդություն ունեցող աղջիկը չի կարողանում նորմալ սնվել (ֆոտո)

16-ամյա Էյմի-Լի Սմիթը անգլիական Մերսիսայդ կոմսությունից տառապում է հազվադեպ հիվանդությամբ՝ էոզինոֆիլային էզոֆագիտ, որի պատճառով ոչինչ չի կարողանում ուտել։

Ինչպես պատմում է The Liverpool Echo պարբերականը, աղջիկը մանուկ հասակից թույլ իմունիտետ ուներ, հաճախ ունենում էր ալերգիկ ռեակցիաներ։ Նրան կանոնավորապես բժշկի էին տանում, բիոպսիա եւ էնդոսկոպիա անում։ Երբ 10 տարեկան էր, նրա մոտ ախտորոշեցին էոզինոֆիլային էզոֆագիտ՝ քրոնիկական իմունային հիվանդություն, որի դեպքում զարգանում է բորբոքային ռեակցիա կերակրափողում։

2016-ին Էյմի-Լիի առողջական վիճակը կտրուկ վատացավ։ Բժիշկները ստիպված էին խողովակ դնել, որով նրա օրգանիզմ սնունդ էր մատակարարվում։

«Խողովակով սնվելը բարոյապես ծանր բան էր, դա գրեթե կործանեց ինձ,- հիշում է աղջիկը։- Ես դարձա անինքնավստահ։ Դա անդրադարձավ ոչ միայն ինձ, այլ նաեւ ընտանիքիս վրա»։

Ներկա պահին աղջիկը սնվում է առանց խողովակի, բայց նախկինի պես ամեն օր պայքարում է հիվանդության դեմ։

«Ես ամեն օր արթնանում են ու տառապում թթվային ռեֆլյուքսից,- ասել է բրիտանուհին։- Դա հանգեցնում է ցավերի կրծքավանդակում, այրոցքի եւ չմարսելուն»։

Աղջկա խոսքով՝ բժիշկները երկար ժամանակ չեն կարողացել ճիշտ ախտորոշում կայացնել, քանի որ նրա հիվանդությունը բավական հազվադեպ է։ Վիճակագրության համաձայն՝  էոզինոֆիլային էզոֆագիտ հանդիպում է հազարից մեկ երեխայի մոտ։