Մեղրամիսից հետո 26-ամյա կնոջ մոտ քաղցկեղ է ախտորոշվել
11:01 11 մայիսի, 2019Անգլիայից 26-ամյա Ջուլյա Քալենի մոտ քաղցկեղ է ախտորոշվել մեղրամիսից անմիջապես հետո: Ջուլյայի մայրը քաղցկեղից մահացել էր 2016 թվականին, եւ հիմա երիտասարդ կինը հուսահատորեն պայքարում է հանուն իր կյանքի:
Ջուլյան շաբաթական 60 ժամ բուժքույր էր աշխատում: Ամուսնանալուց կարճ ժամանակ անց նա ուշադրություն է դարձրել սաստիկ հոգնածության եւ աստիճաններով բարձրանալիս սրտի խփոցի վրա: Ջուլյան ախտանշանները վերագրում էր աշխատանքից հետո հոգնածությանը, սակայն առողջական վիճակը շարունակում էր անշեղորեն վատթարանալ:
Բժիշկները նրա մոտ ախտորոշել են սուր լիմֆոբլաստային լեյկոզ՝ արյունաստեղծ համակարգի չարորակ հիվանդություն: «Դժվար է հավատալ, որ նման բան կարող էր պատահել ամուսնության հենց առաջին տարում»,- տրտմությամբ ասում է կինը:
Վտանգավորն այն է, որ հիվանդությունն արագ է զարգանում: Հիմա կինը քիմիաթերապիայի կուրս է ստանում, իսկ օգոստոսին, եթե բարելավում գրանցվի, նրան կկատարեն ցողունային բջիջների պատվաստում: Այս միջամտությունը բժիշկներին թույլ կտա բուժման մեջ կիրառել դեղամիջոցների ավելի բարձր չափաքանակներ:
Քանի որ բուժումը կարող է անպտղություն առաջացնել, Ջուլյան նախապես մտածել է իր ձվաբջիջները սառեցնելու մասին, ինչը նրան կօգնի ապագայում երեխաներ ունենալ: