Կանանց համար ծխելն անգամ ավելի վնասակար է, քան տղամարդկանց համար. ուսումնասիրություն
09:41 24 մայիսի, 2019Կանանց առողջությանը ծխելն անգամ ավելի շատ վնաս է հասցնում, քան տղամարդկանց առողջությանը, պնդում են Այովա նահանգի համալսարանի գիտնականները: Պարզվում է՝ ծխելը բացասաբար է ազդում կանանց կոգնիտիվ գործառույթների վրա՝ դրանք ավելի արագ ու ուժեղ վատթարացնելով, քան տղամարդկանց մոտ:
Մասնագետները հետաքրքիր փորձ են անցկացրել տարբեր տարիքի կանանց եւ տղամարդկանց մասնակցությամբ՝ ինչպես ծխող, այնպես էլ չծխող :
Բոլոր մասնակիցները կոգնիտիվ թեստեր են անցել, որոնք թույլ են տալիս որոշել տրամաբանական դատողության, ծրագրման եւ կազմակերպման վերաբերյալ նրանց ընդունակությունների աստիճանը:
Արդյունքում գիտնականները հետաքրքիր օրինաչափություն են հայտնաբերել. ծխող եւ չծխող տղամարդկանց շրջանում կոգնիտիվ գործունեության տեսանկյունից էական վիճակագրական տարբերություն չի եղել:
Սակայն կանանց շրջանում տարբերություն եղել է եւ բավականին լուրջ. նրանց թեստերը, ովքեր օրական 20 եւ ավելի շատ ծխախոտ են ծխել, զգալիորեն վատ են եղել, քան չծխողների դեպքում:
Ուսումնասիրության հեղինակների խոսքով՝ կենդանիների վրա նախնական հետազոտությունները ցույց են տվել, որ նիկոտինը նվազեցնում է արյան մեջ էստրոգենի կոնցենտրացիան: Ծխող կանանց մոտ մտածողության գործառույթների խախտումը կարող է կապված լինել օրգանիզմում էստրոգենի հորմոնի արտադրման նվազման հետ, որը դրական է ազդում ուղեղի աշխատանքի վրա:
Գիտնականների խոսքով՝ հատկապես ուժեղ էստրոգենի պակասը կարող է ազդել ծխող կանանց կոգնիտիվ գործառույթների վրա դաշտանադադարի ժամանակ, երբ այդ հորմոնի արտադրումը առանց այդ էլ նվազում է: