Առաջին անգամ վիրաբուժության պատմության մեջ. կերակրափողի քաղցկեղի հեռացման վիրահատության 360 աստիճանանոց տեսանկարահանում (ֆոտո, վիդեո)
13:15 23 մայիսի, 2019Վիրաբուժության պատմության մեջ առաջին անգամ կերակրափողի քաղցկեղի հեռացման վիրահատությունը նկարահանվել է 360 աստիճանանոց տեսախցիկների օգնությամբ։ Վիրահատությունը տեւել է 7 ժամ եւ կատարվել Սաութհեմփթոնի (Մեծ Բրիտանիա) Համալսարանական հիվանդանոցի վիրաբույժ Թիմ Անդերվուդի գլխավորությամբ։
Պացիենտը՝ 66-ամյա Ջանեթ Ջենքինսը, խոստովանել է, որ ցնցվել է՝ տեսնելով իր վիրահատության ունիկալ տեսանյութը։ Բժիշկները նշում են, որ 360 աստիճանանոց վիդեոն արվել է այն բանի համար, որպեսզի ցայտուն ցույց տա վիրահատարանում տիրող մթնոլորտը։ Տեսանյութն իրականություն է դարձել շնորհիվ քաղցկեղի ուսումնասիրման Cancer Research UK բարեգործական կազմակերպության աջակցության։
Վիրահատության առաջին փուլի ընթացքում վիրահատվել է ստամոքսը՝ ուռուցքը եւ լիմֆատիկ հանգույցները հեռացնելու, ինչպես նաեւ կերակրափողի տրանսպլանտատի ձեւավորման համար։ Երկրորդ փուլում կերակրափողը մասամբ հեռացվել է, իսկ հետո՝ վերաձեւավորվել։ Վիրաբույժները նշում են, որ տեսանյութը կարող է օգտագործվել որպես ուսումնական ձեռնարկ։
Տեսանյութի ամբողջական տարբերակը հասանելի է բջջային սարքերում։
Source: The Daily Mail