Կա՞ կապ ինտելեկտի մակարդակի եւ երակների վարիկոզ լայնացման զարգացման ռիսկի միջեւ
23:45 29 մայիսի, 2019Ինտելեկտի մակարդակի եւ երակների վարիկոզ լայնացման զարգացման ռիսկի միջեւ կարող է անսովոր կապ լինել՝ պարզել են ՌԴ բջջաբանության եւ գենետիկայի ինստիտուտի հետազոտողները:
Նրանք ուսումնասիրել են հնարավոր գենետիկ գործոնները, որոնք կապված են վարիկոզային հիվանդության զարգացման հետ, եւ հայտնաբերել, որ մարդու օրգանիզմում կան գեներ եւ սպիտակուցներ, որոնք մասնակցում են երակների վարիկոզ լայնացման պաթոլոգիական գործընթացին: Նրանք հայտնաբերել են նաեւ երակների վարիկոզ լայնացման եւ ինտելեկտի միջեւ կապը. բարձ ինտելեկտ ունեցող մարդկանց մոտ երակների վարիկոզ լայնացում հազվադեպ է հանդիպում:
«Տեսականորեն կարող է լինել այսպես. բարձր ինտելեկտը թույլ է տալիս զբաղվել մտավոր աշխատանաքով եւ խուսափել ֆիզիկական աշխատանքից, ինչը նվազեցնում է երակների վարիկոզ լայնացման առաջացումը»,- ասել է ինստիտուտի ավագ գիտաշխատող Ալեքսանդրա Շադրինան:
Միեւնույն ժամանակ, ինչպես նկատել է գիտնականը, չի կարելի պնդել, որ երակների վարիկոզ լայնացում ունեցող մարդը ցածր ինտելեկտ ունի: Չի կարելի նաեւ պնդել, որ եթե բարձր է ինտելեկտը, ապա երակների վարիկոզ լայնացում երբեք չի լինի:
«Դա միջինացված օրինաչափություն է, ընդ որում, բավականին թույլ՝ չնայած նրան, որ դրա առկայությունը կասկած չի առաջացնում»,- բացատրել է նա:
Մասնագետները վերլուծել են ավելի քան 400 000 եվրոպացիների գենետիկ տվյալներ, որոնք վերցվել են Մեծ Բրիտանիայի բաց կենսաբանկից: Նրանց հաջողվել է բացահայտել 9 գեն եւ 2 սպիտակուց, որոնց վրա ազդեցությունը կարող է վարիկոզի բուժման միջոց լինել: Եթե գիտնականներին հաջողվի սահմանել դեղորայքը, ապա հնարավոր կլինի նրանց շնորհավորել՝ այդ հիվանդության դեմ հաղթանակի համար, որի դեմ արդյունավետ պայքարում է միայն վիրաբուժությունը: