29-ամյա Ժոզեֆինա Սաֆոլկը մահացել է արգանդի վզիկի քաղցկեղի հետեւանքով այն պատճառով, որ բժիշկները 10 ամիս չեն կարողացել ճիշտ ախտորոշում կատարել:
Բժիշկները նրա առողջական խնդիրները վերագրել են հորմոնալ անհավասարակշռությանը՝ անտեսելով մշտական արյունահոսության վերաբերյալ նրա գանգատները: Բժիշկներին գրեթե մեկ տարի էր պետք արգանդի վզիկի քաղցկեղը հայտնաբերելու համար: Կինն, ընդհանուր առմամբ, բժշկական օգնության է դիմել 5 անգամ: Արդյունքում բաց է թողնվել ժամանակը, որն անհրաժեշտ էր ժամանակին բուժում սկսելու համար:
Նշվում է, որ Մեծ Բրիտանիայի Առողջապահության ազգային ծառայության (NHS) պաշտոնական կայքում անոմալ արյունահոսությունը արգանդի վզիկի քաղցկեղի ախտանշանների ցանկում առաջին տեղում է: Ժոզեֆինայի հարազատները եւ մերձավորները չափազանց վրդովված են այն հանգամանքից, որ բժիշկները 10 ամիս անտեսել են այս ախտանշանը՝ այն ընդունելով անկանոն դաշտանի դրսեւորում: Ուռուցքը հայտնաբերած սքանավորումը կատարվել է Ժոզեֆինայի ընկերոջ նախաձեռնությամբ, սակայն արդեն չափից ավելի ուշ էր:
Հաղորդվում է, որ Ժոզեֆինան երկու փոքր երեխա ուներ: