Արեւմտյան Ավստրալիայի համալսարանի գիտնականներին հաջողվել է հերքել տարածված այն կարծիքը, որ կանացի արգանդը մանրէներից զերծ միջավայր է:
Մասնագետները հետազոտության շրջանակում վերլուծել են 50 առողջ հղիներից վերցված ամնիոտիկ հեղուկի (հղիության ժամանակ պտղաթաղանթի մեջ գտնվող բիոլոգիապես ակտիվ հեղուկ միջավայր) նմուշները: Պարզվել է, որ բոլոր նմուշներում գործնականում առկա էին բակտերիալ ԴՆԹ-ի հետքեր: Ավելին՝ բակտերիաներ են հայտնաբերվել նաեւ բոլոր 50 նորածինների մեկոնիայում (կղանքանման նյութ, որը պտղի մոտ ստեղծվում է ներարգանդային զարգացման փուլում):
Անալիզը ցույց է տվել, որ ամնիոտիկ լուծույթը հիմնականում պարունակել է ստաֆիլոկոկ, ինչպես նաեւ այնպիսի մաշկային տիպիկ բակտերիաներ, ինչպես, օրինակ, Propionibacterium acnes:
Հաշվի առնելով այն, որ ո՛չ մոր, ո՛չ երեխայի մոտ չեն հայտնաբերվել ինֆեկցիայի ոչ մի նշաններ՝ գիտնականները ենթադրում են, որ մոր արգանդում երեխայի մեջ բակտերիաների բնակեցումը առողջ պրոցես է: